დავით ბაგრატიონისა და ანა ბაგრატიონის ადვოკატები ურთიერთბრალდებებს პასუხობენ

„დავით ბაგრატიონს ანა ბაგრატიონზე ფიზიკურად არასდროს უძალადია“, - განცხადება მედიასთან დავით ბაგრატიონ გრუზინსკის ადვოკატმა გააკეთა. ლევან ჩხეიძის განმარტებით, ანა ბაგრატიონ გრუზინსკიზე არც ფსიქოლოგიური ზეწოლა ყოფილა. 

დავით ბაგრატიონ გრუზინსკის უფლებადამცველის თქმით, ანა ბაგრატიონ გრუზინსკი დავითის საგურამოს სახლში ნამყოფი საერთოდ არ არის და ინფორმაცია მისი დაცვის ქვეშ მყოფის დისკრედიტაციას ემსახურება.

„თუ ექსპერტმა იცოდა აღნიშნული დანაშაულის შესახებ, მიჩნდება შეკითხვა: რატომ არ მიმართა ექსპერტმა პოლიციას? რატომ არ მიმართა პოლიციას მძღოლმაც, რომელმაც როგორც ამტკიცებენ, შეიტყო დანაშაულის შესახებ. ქალბატონმა ანამ შესაძლებელია ილაპარაკოს ბევრი რამ, მაგრამ ეს სულაც არ ნიშნავს იმას, რომ სიმართლეა. თუ მართლა ადგილი ჰქონდა ფაქტს და არ აქვს მნიშვნელობა ვინ მიაყენა მას დაზიანებები, ექსპერტი უკვე დასაჭერია, რადგან მან იცოდა დანაშაულის ჩადენის შესახებ და არ განაცხადა. თუ საქმის კურსში იყო მძღოლი, ისიც დასაჭერია“, - განაცხადა ლევან ჩხეიძემ ჟურნალისტებთან.

ანა ბაგრატიონის უფლებადამცველი სამხარაულის ექსპერტიზის გაყალბების თაობაზე დავით ბაგრატიონ-მუხრანელის მხარის ბრალდებას უარყოფს. ადვოკატის თქმით, არსებობენ მოწმეები, რომლებიც ამ ძალადობის ფაქტს დაადასტურებენ. 

„რა გაყალბებაზეა საუბარი, რა ინტერესი აქვს ბიუროს ჩვენ პრივატულ დავაში?! დასკვნაში წერია, რომ სხეულზე აქვს მრავალი სისხლჩაქცევა, რაც ბლაგვი საგნით არის მიყენებული“, - განმარტავს ანა ბაგრატიონის ადვოკატი ლევან გორელაშვილი.

ანა ბაგრატიონ-გრუზინსკი ამ წუთებში თბილისის პოლიციის მთავარ სამმართველოში გამოკითხვაზე იმყოფება. საქმე დავით ბაგრატიონ-მუხრანელის მიერ ანა ბაგრატიონ-გრუზინსკზე შესაძლო ძალადობის ფაქტს ეხება, რომელიც 2014 წლის 9 მაისს საგურამოში მოხდა. გამოძიების ფარგლებში ანა ბაგრატიონ-გრუზინსკის ადვოკატსაც გამოკითხავენ. 

ცნობისთვის, ანა ბაგრატიონ გრუზინსკისა და დავით ბაგრატიონ მუხრანელის სამეფო ქორწილი, პატრიარქის ინიციატივით, 2009 წელს სამებაში გაიმართა. წყვილი ოფიციალურად 2016 წელს განქორწინდა.