დავით ბაგრატიონ-მუხრანელის ადვოკატის ბრალდებებს სამხარაულის ექსპერტიზის ბიურო პასუხობს

ლევან სამხარაულის სახელობის სასამართლო ექსპერტიზის ეროვნული ბიურო დავით ბაგრატიონ-მუხრანელის ადვოკატის, ლევან ჩხეიძის ბრალდებებს პასუხობს.

როგორც imedinews-ს ბიუროში განუცხადეს, ანა ბაგრატიონ-გრუზინსკის გამოკვლევის შედეგები სამართალდამცავ ორგანოს ექსპერტიზის ბიურომ იმ მიზეზით არ აცნობა, რომ კანონით ამის ვალდებულება 2014 წელს არ ჰქონდა. 

„2014 წლის 14 მაისს, სსიპ ლევან სამხარაულის სახელობის სასამართლო ექსპერტიზის ეროვნულ ბიუროს მიმართა ანნა ბაგრატიონ-გრუზინსკიმ, რომელმაც საკუთარ თავზე დანიშნა ამბულატორიული სამედიცინო შემოწმება, სხეულზე არსებული დაზიანების და მათი ხანდაზმულობის შესახებ. დასკვნა გაიცა 2014 წლის 20 მაისს. ანა ბაგრატიონ-გრუზინსკის გამოკვლევის შედეგები სამართალდამცავ ორგანოებს არ ეცნობა. აღნიშნული ვალდებულება ბიუროს გააჩნია 2017 წლის 1 ივნისიდან „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვის და დახმარების შესახებ“ საქართველოს კანონის მე-9 პრიმა მუხლის საფუძველზე. აგრეთვე ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ ევროპის საბჭოს 2011 წლის 11 მაისის კონვენციის 27-ე და 28-ე მუხლების საფუძველზე. მითითებული აქტი საქართველოში ამოქმედდა 2017 წლის 1 სექტემბრიდან“, - განმარტავენ ლევან სამხარაულის ექსპერტიზის ეროვნულ ბიუროში. 

მანამდე ადვოკატი ლევან ჩხეიძე აცხადებდა, რომ სამხარაულის ბიუროს დასკვნის მიკერძოებულობას არ გამორიცხავდა. 

სამართალდამცველ ორგანოში იძიებენ საქმეს, რომელიც დავით ბაგრატიონ-მუხრანელის მიერ ანა ბაგრატიონ-გრუზინსკზე შესაძლო ფიზიკური ძალადობის ფაქტს ეხება, რომელიც 2014 წლის 9 მაისს საგურამოში მოხდა. გამოძიების ფარგლებში ანა ბაგრატიონ-გრუზინსკის ადვოკატსაც გამოკითხავენ, თუმცა ჯერ უცნობია როდის.

ცნობისთვის, ანა ბაგრატიონ გრუზინსკისა და დავით ბაგრატიონ მუხრანელის სამეფო ქორწილი, პატრიარქის ინიციატივით, 2009 წელს სამებაში გაიმართა. წყვილი ოფიციალურად 2016 წელს განქორწინდა.

პარალელურად, ანა ბაგრატიონ-გრუზინსკი და მისი მამა ნუგზარი ყოფილ სიძეს, დავით ბაგრატიონ მუხრანელს სასამართლოში უჩივიან. სამოქალაქო დავა თბილისის საქალაქო სასამართლოში სამეფო სახლის სახელით უნებართვოდ სარგებლობის აღკვეთაზე მიმდინარეობს.