ადვოკატი: ექსპერტიზის დასკვნით ანა ბაგრატიონ-გრუზინსკის სხეულზე სისხლჩაქცევები ჰქონდა

ანა ბაგრატიონ-გრუზინსკის ადვოკატმა სამხარაულის ექსპერტიზის ბიუროს მიერ გაცემულ დასკვნა წარმოადგინა, რომელშიც „წერია, რომ ანას სხეულზე ჰქონდა მრავალი სისხლჩაქცევა, რომელიც მიყენებულია რამე მკვრივი, ბლაგვის საგნის ზემოქმედებით“.

ადვოკატ ლევან გორელაშვილის თქმით, ანა ბაგრატიონ-გრუზინსკის დავით ბაგრატიონ-მუხრანელის მიერ მიყენებული დაზიანებები სახეზე აღენიშნებოდა. ასე პასუხობს ანა ბაგრატიონის ადვოკატი დავით ბაგრატიონ-მუხრანელის ადვოკატის განცხადებას, რომ ექსპერტიზის დასკვნა სავარაუდოდ მიკერძოებულია. ლევან გორელიშვილის თქმით, ეს სერიოზლი ბრალდებაა, რასაც პასუხს თავად ექსპერტიზის ბიურო გასცემს.

„სამხარაულის ექსპერტიზის ბიუროს მიერ გაცემულ დასკვნაში წერია, რომ ანას სხეულზე აქვს მრავალი სისხლჩაქცევა, რომელიც მიყენებულია რამე მკვრივი, ბლაგვის საგნის ზემოქმედებით. რა საგნით მიაყენა დავითმა ანას დაზიანებები, ჩემთვის ეს კონკრეტულად უცნობია. რამდენადაც ვიცი, ანა იმ მომენტში თითქმის გონებადაკარგულ მდგომარეობაში იყო“, - განაცხადა ლევან გორელიშვილმა.

ჟურნალისტებთან საუბრისას ანა ბაგრატიონ-გრუზინსკის ადვოკატმა სამეფო წყვილს შორის რამდენიმე წლის წინ მომხდარი ფიზიკური დაპირპირების დეტალებზე ისაუბრა. აღნიშნა, რომ ფიზიკური ზიანის მიყენების შემდეგ დავითმა ანას თავისუფლება უკანონოდ აღუკვეთა.

გარდა ამისა, გორელიშვილის თქმით, დაპირისპირებების მიუხედავად სამეფო წყვილს თანაცხოვრება არ შეუწყვიტავს, ხოლო ოფიციალურად 2016 წელს განქორწინდნენ.

„როგორც ჩემთვის არის ცნობილი, ძალადობის შემდგომ, რასაც მეფე აკეთებს, არის ის, რომ დავითი უკავშირდება თავის ერთ-ერთ მეგობარს და აფთიაქიდან მედიკამენტების წამოღებას სთხოვს. შემდგომ ელოდება, რომ იმოქმედოს ამ მედიკამენტებმა. ანას ეს დაზიანებები სახეზე აღენიშნებოდა. ამ მიზნით მან დაუმტვრია ტელეფონი, საშუალება არ მისცა, რომ სადმე დაერეკა. დავითმა ანას თავისი ტელეფინით დაარეკინა თავის მძღოლთან და სთხოვა, რომ იმ დღეს არ გამოევლო და ორი დღის შემდგომ გამოევლო. ამასთან, საშუალებას არ აძლევდა, რომ საგურამო დაეტოვებინა. გარდა ამისა, ანას დაარეკინა დედასთან, რომელსაც უთხრა, რომ ის საგურამოდან 2 დღის განმავლობაში ვერ დაბრუნდებოდა. წყვილი 2014 წელს ერთად ცხოვრობდა“, - განაცხადა გორელიშვილმა.

ადვოკატის განმარტებით, სამეფო წვყვილს შორის მომხდარ ფიზიკურ დაპირისპირებაზე საგამოძიებო უწყებაში მოწმის სახით გამოკითხვაზე პირადადაც არის დაბარებული, თუმცა გამოკითხვის თარიღი მისთვის ჯერჯერობით უცნობია.

„ძალადობის ფაქტს მე პირადად არ შევსწრებივარ. ამას დავითის, ანას და მცირეწლოვანი ბავშვის გარდა არავინ შესწრებია. იმ პერიოდში ანას საერთოდ არ ვიცნობდი, თუმცა ვიცნობ ადამიანს, რომელიც ამბობს, რომ საგურამოდან ანა წამოიყვანა. ეს არის მძღოლი დავით ვასაძე. ვასაძე გამოკითხული არ არის, თუმცა იგეგმება მისი გამოკითხვა“, - განაცხადა გორელიშვილმა.

მისივე ინფორმაციით, სამოქალაქო დავის ფარგლებში უკვე გამოიკითხნენ მებაღე, დამხმარე ქალბატონი და ოჯახის მეგობარი. ადვოკატის თქმით, ყველა მათგანმა გამოძიებას ერთმანეთისგან განსხვავებული და საპირისპირო ჩვენება მისცა.

„ვფიქრობ, რომ ერთ-ერთი მათგანი პასუხისგებაში აუცილებლადაა მისაცემი, რადგან ის სამი ინფორმაცია, რომელიც მათ ერთდროულად გააჟღერეს, წარმოუდგენელია სიმართლე იყოს. მებაღე ამბობს, რომ ანა საგურამოში ნანახი ჰყავს. ოჯახის მეგობარი ამბობს, რომ ანას საგურამოში ფეხი არასდროს დაუდგამს. ეს ესპანელი პიროვნებაა და თარჯიმანმა მისი სიტყვები ასე თარგმნა. ხოლო დამლაგებელი ქალბატონი ამბობს, რომ ანას საგურამოში არასდროს უცხოვრია და განმარტავს, რომ ანა პირველად მას შემდეგ ნახა, რაც ტელევიზიაში სიუჟეტი გავიდა. ამიტომ სამივე ეს ჩვენება გამორიცხულია, ერთდროულად სიმართლე იყოს. ვფირობ, რომ მოწმეები მიზანმიმართულად გაფრთხილებულები იყვნენ იმაზე, თუ რა ჩვენება უნდა მიეცათ. ეს ესპანელი მეგობარი დავით ბაგრატიონის კმაყოფაზეა. 2014 წლიდან საქართველოშია ჩამოსული. მებაღე და დამლაგებელიც დღესაც საგურამოში მუშაობენ“, - განაცხადა ადვოკატმა.