აშშ-ში მიაჩნიათ რომ ნატომ თავდაცვის სფეროში საქართველოსა და უკრაინის დახმარება უნდა გააძლიეროს

საქართველოს საგარეო საქმეთა სამინისტროს ცნობით, აშშ-ის წარმომადგენელთა პალატის საგარეო ურთიერთობათა კომიტეტის მსვლელობისას კონგრესმენებმა და მომხსენებლებმა საქართველოსადმი აშშ-ის უპირობო მხარდაჭერა გამოხატეს.

მოსმენისას აღინიშნა, რომ საჭიროა, ნატომ თავდაცვითი უსაფრთხოების სფეროში გააძლიეროს საქართველოსა და უკრაინის დახმარება.

მოსმენისას სენატის საგარეო ურთიერთობათა კომიტეტის თავმჯდომარემ, სენატორმა ჯიმ რიშმა (რესპუბლიკელი-აიდაჰოს შტატი) შესავალ სიტყვაში ხაზი გაუსვა ნატოს მნიშვნელობას. მისი განცხადებით, ნატო ყველაზე უფრო წარმატებული სამხედრო-პოლიტიკური ალიანსია მსოფლიოში, რომელიც იცავს საერთო ღირებულებებსა და პრინციპებს, მათ შორი დემოკრატიას, ადამიანის უფლებებსა და კანონის უზენაესობას.

სენატორმა რიშმა აღნიშნა, რომ ნატო არ არის მხოლოდ სამხედრო ორგანიზაცია და ხაზი გაუსვა მის პოლიტიკურ და ეკონომიკურ მნიშვნელობას, რომელიც ეკონომიკური ზრდისა და ინვესტირებისათვის სტაბილურ გარემოს უზრუნველყოფს.

„ყოფილი საბჭოთა კავშირის ქვეყნები მიისწრაფიან გაწევრიანდნენ ნატოში, არა მხოლოდ რუსეთისაგან თავდაცვის, არამედ ასევე ეკონომიკური განვითარების მიზნით. რუსეთი ხელახლა გახდა ნატო-ს საფრთხე. თუ კვლავაც არსებობს რაიმე სახის ეჭვი ამის თაობაზე, შეგიძლიათ გაესაუბროთ საქართველოსა და უკრაინის ხელისუფლებას, დღეს რუსეთიდან მომდინარე საშიშროების გასაცნობიერებლად", - განაცხადა სენატორმა.

ატლანტიკური საბჭოს უფროსი მკვლევრის, იან ბრზეჟინსკის თქმით, ნატოს ღირებულება კიდევ უფრო გაიზარდა დღევანდელი მზარდი უსაფრთხოების გარემოში:

"მოსკოვის მხრიდან უკრაინასა და საქართველოში შეჭრა, მისი სამხედრო პროვოკაციები, მკვლელობები, უცხო ქვეყნების არჩევნებში ჩარევა და შეიარაღების კონტროლის სფეროში საერთაშორისო ხელშეკრულებების დარღვევა წარმოადგენს მაგალითების მხოლოდ ერთ ნაწილს, თუ როგორი საფრთხის წინაშე იმყოფება საერთაშორისო სამართალზე დამყარებული წესრიგი, რომელიც გლობალური მშვიდობის, თავისუფლებისა და კეთილდღეობის ავანგარდში იდგა", - აღნიშნა იან ბრზეჟინსკიმ და ნატოს ერთ-ერთ პრიორიტეტულ  მიმართულებად საქართველოსა და უკრაინის ნატოში გაწევრიანება დასახელა. 

"ალიანსის უახლესი წევრები ევროპის ყველაზე უფრო მტკიცე ტრანსატლანტისტები არიან და აშშ-ის მიერ წარმოებულ ოპერაციებში, მათ შორის ევროპის მიღმა, მონაწილეობის ყველაზე უფრო მეტი სურვილი გააჩნიათ. ნატო-ში მონტენეგროს ბოლოდროინდელი გაწევრიანება და ამ გზაზე მყოფი მაკედონიის ორგანიზაციაში მოსალოდნელი ინტეგრირება ერთიანი ევროპის ხედვის განხორციელებისაკენ მნიშვნელოვან ნაბიჯებს წარმოადგენს. ამასთანავე, ალიანსმა უნდა განსაზღვროს უკრაინისა და საქართველოს ნატო-ში გაწევრიანების მკაფიო გზა იმის გათვალისწინებით, რომ ორივე ქვეყანას დაჭირდება დრო შესაბამისი პოლიტიკური და სამხედრო მოთხოვნების დასაკმაყოფილებლად", - განაცხადა ბრზეჟინსკიმ.

მეზობლების მიმართ რუსეთის აგრესიული პოლიტიკის თაობაზე, სენატის საგარეო ურთიერთობათა კომიტეტის თანათავმჯდომარის, სენატორ ბობ მენენდესის (დემოკრატი, ნიუ-იორკი) მიერ დასმული შეკითხვის პასუხად, ბრზეჟინსკიმ განაცხადა, „რუსეთის რევანშიზმისა და აგრესიის საპასუხოდ დასავლეთის მიდგომა ფუნდამენტური სახის შეცდომაა. 15 წელი გავიდა რუსეთის მიერ 2008 წელს საქართველოში შეჭრის დღიდან. ჩვენი სტრატეგია, საპასუხო ქმედებების ნაბიჯ-ნაბიჯ ზრდის (ინკრიმენტალიზმის) სტრატეგიაა. რუსეთი არღვევს დამოუკიდებელი, დემოკრატიული ერების სუვერენიტეტს; იტაცებს ტერიტორიებს და ჩვენი პასუხი სამშვიდობო შეთანხმებაა.“ 

ბრზეჟინსკის განმარტებით, რუსეთის აგრესიულ ქმედებებზე საპასუხოდ საჭიროა დასავლეთმა ჩრდილო-ცენტრალურ ევროპაში გააძლიეროს სამხედრო ყოფნა; გაზარდოს რუსეთის წინააღმდეგ სანქციები, რომელიც რუსეთის ეკონომიკური დასუსტების მიზნით მიმართული უნდა იყოს რუსეთის საბანკო სისტემაზე; ამას გარდა, საჭიროა, რომ დასავლეთმა რუსეთის წინააღმდეგ განახორციელოს ხელის შეშლის სტრატეგია.