კალაძე: ტყუილია ინფორმაცია, თითქოს თეთრი ფირის გადაკვრა მანქანას აფუჭებს

ტაქსებთან დაკავშირებული რეგულაციები არ გადავადდება. დედაქალაქის მერმა დღევანდელ პროტესტს "ქრონიკის" ეთერიდან  უპასუხა. კახა კალაძემ კიდევ ერთხელ განმარტა, რომ ვისაც მანქანის გადაღებვა პრობლემას უქმნის, შეუძლია თეთრი ფირი გამოიყენოს.

„ყველა მძღოლმა ძალიან კარგად იცის, რომ პირიქით, ფირის გადაკვრა ინახავს საღებავს, იცავს კენჭებისგან, გაფხაჭნისგან, დაზიანებებისგან. საკუთარ ავტომობილზე მაქვს გადაკრული და ვიცი, რამდენად კარგია. ყველა ის ტვირთი და პრობლემა, რაც შეიძლება, რომ ტაქსის მძღოლებისთვის ყოფილიყო, ყველაფერი გავითვალისწინეთ. გავითვალისწინეთ არსებული სოციალური მდგომარეობა. ეს რეფორმა აუცილებლად განხორციელდება. ყველა ისეთი საკითხი, რომელიც შესაძლებელი იყო პრობლემური ყოფილიყო მძღოლებისთვის, ყველაფერი აბსოლუტურად გათვალისწინებულია. ახლა მთავარია, რომ ტექდათვალიერება გავლილი ჰქონდეთ და მანქანა მოწესრიგებული იყოს. ბრენდირებული იქნება „ა“ კატეგორიის ტაქსები. ტაქსი არის ზოგადად ქალაქის სახე, შესაბამისად, იმ სატრანსპორტო პოლიტიკაში, რომელიც წარდგენილი გვაქვს, ტაქსის რეფორმა არის ერთ-ერთი მიმართულება, რომელიც აუცილებლად განხორციელდება“, – განაცხადა კახა კალაძემ.

არჩევანის შესაძლებლობა აქვთ, თუმცა მაინც ქუჩაში გავიდნენ და საკუთარი პოზიცია მერიის ნაცვლად, რომელიც ამ სიახლის ავტორი და ინიციატორია, ბიძინა ივანიშვილის სახლთან გამოხატეს. ეს იდეა მათ ლეიბორისტებმა მიაწოდეს, რომელთა ლიდერი დღევანდელ აქციაზე განსაკუთრებულად აქტიურობდა. კახა კალაძე ფიქრობს, რომ შეკრება პოლიტიკურად მოტივირებული იყო. ამ დროისათვის აქცია დასრულებულია.