ხმალაძე: კარგი იქნება თუ ვასილ სოფრომაძე თავისი არაკომპეტენტური თანამშრომლების ბოდვას არ აყვება

თბილისის ვიცემერმა ირაკლი ხმალაძემ დედაქალაქის მთავრობის სხდომის დასრულების შემდეგ "ფრესკოს" დამფუძნებლის, ვასილ სოფრომაძის ბრალდებებს უპასუხა. ირაკლი ხმალაძის თქმით, სოფრომაძეს ამ განცხადებების გამო უნდა რცხვენოდეს. ხმალაძის განმარტებით, თბილისის არქიტექტურის სამსახური გასცემს რეკომენდაციას და მითითებებს, მათგან მითითება სავალდებულოა შესასრულებლად, რეკომენდაცია კი - არა.

ირაკლი ხმალაძის თქმით, ვასილ სოფრომაძეს მისმა თანამშრომლებმა არასწორი ინფორმაცია მიაწოდეს. 

"სოფრომაძეს, მგონია, რომ უნდა რცხვენოდეს ასეთი განცხადების და ასეთი საქციელის. გუშინ ვერ გავაკეთე კომენტარი, რადგან დრო დამჭირდა ბრალდების შინაარსი გამერკვია. არქიტექტურის სამსახური გასცემს რეკომენდაციას და მითითებებს. მითითება სავალდებულოა, რეკომენდაცია - არა. მისმა თანამშრომლებმა ბატონ ვასილს მიაწოდეს არასწორი ინფორმაცია და გაკეთდა არასწორი ვიდეომიმართვა. ამაში რომ დავრწმუნდეთ. "ფრესკოს" შეუძლია სხვა ხარვეზები გაასწოროს, რომელიც მის პროექტს აქვს, ეს რეკომენდაცია არ მიიღოს მხედველობაში და ჩააბაროს, აიღებს მშენებლობის ნებართვას და მერე მგონია, რომ სინანულის გრძნობა გაუჩნდება. თუმცა, არ მგონია, ადამიანობა ეყოს და საჯაროდ გამოხატოს.

იქ არის მცირე ზომის ნაკვეთი და დგას ე.წ. ბარაკი, რომელიც არ ეკუთვნის ჩემს სიმამრს, რამდენიმე თანამესაკუთრე ჰყავს და მათ შორის ჩემი სიმამრიც, რომელიც იქ ცხოვრობს. ერთი თუ ორი ოთახი აქვს, ძალიან იშვიათად მივდივარ ხოლმე, საკმაოდ კარგად გრძნობს თავს და არსად წასვლას არ აპირებს. არავინ სოფრომაძეს ამ ფართის ყიდვას არ აიძულებს.

მგონი, თვითონაც არ უთქვამს მას იძულება და კარგი იქნება თუ ბატონი ვასილი არ აჰყვება თავისი არაკომპეტენტური თანამშრომლების ბოდვებს. ასევე მინდა გამოვეხმაურო ამ თემაზე აყოლილ პოლიტიკოსებს, გიგი უგულავას და ნიკა მელიას. ბატონო გიგი, თქვენ მერი ბრძანდებოდით და ბატონო ნიკა, თქვენ მერობას აპირებდით, მგონია, რომ ელემენტარულად უნდა იცოდეთ ქალაქდაგეგმარების პროცესები. აქედან გამომდინარე, ჩემთვის ცოტა გასაკვირი იყო კომენტარი ამ საკითხთან დაკავშირებით. ზოგადად, თუ ნერვიულობენ ქალაქში რა ხდება და მერია რით არის დაკავებული, შემიძლია, მათ გამოვუყო დრო, შვხვდე და მოვუყვე დედაქალაქში რა სიკეთეები ხორციელდება და რა სიკეთეები ელოდება ქალაქს მომდევნო თვეებში და წლებში. ასევე, მოვუყვე ბატონ გიგის, როგორ ვუმკლავდებით მის მიერ დატოვებულ პრობლემებს და ზოგ შემთხვევაში როგორ ვერ ვუმკლავდებით. მე ამისთვის მზად ვარ", - განაცხადა ხმალაძემ.

„ფრესკოს“ დამფუძნებელმა ვასილ სოფრომაძემ სოციალურ ქსელში ახალი ვიდეომიმართვა გაავრცელა, რომელშიც ამბობს, რომ თბილისში, წერეთლის გამზირზე ახალი მაღაზიის აშენება სურს, თბილისის მერია კი ერთ-ერთი მაღალჩინოსნის ნათესავის მიწის ნაკვეთის ყიდვას სთავაზობს.

სოფრომაძის ბრალდებასთან დაკავშირებით კომენტარი თბილისის მერის მოადგილემ, მაია ბითაძემაც გააკეთა. მისი განცხადებით, მერიის მიერ სოფრომაძისთვის გაგზავნილი წერილი სარეკომენდაციო ხასიათის მითითებაა, რასაც მერია რეგულარულად გასცემს განაშენიანების გეგმის ფარგლებში. ბითაძემ სოფრომაძის იურისტებს კანონმდებლობაში კარგად გარკვევისკენ მოუწოდა.