ჭიდაობის ფედერაციის პრეზიდენტის საქმის არსებითი განხილვა დღეს გაიმართება

თბილისის საქალაქო სასამართლოში საქართველოს ჭიდაობის ფედერაციის პრეზიდენტის საქმის არსებითი განხილვა დღეს გაიმართება. 

გეგა გეგეშიძის ადვოკატი მარინა ქურციკიძე რამდენიმე შუამდგომლობის დაყენებას გეგმავს. ადვოკატის ინფორმაციით, ერთ-ერთ ქვეყანაში ფიზიკური დაპირისპირების გამო, ზურაბ დათუნაშვილს შენგენის ზონაში შესვლა ერთი წლით აეკრძალა.

დაცვის მხარე სასამართლოს სწორედ ამ ინციდენტზე ინფორმაციის მოპოვებაში დახმარებას სთხოვს, რადგან ადვოკატის თქმით, ინციდენტის შესახებ გამოთხოვილი ინფორმაციის მიწოდებაზე გეგეშიძეს საგარეო საქმეთა სამინისტრომ უარი უთხრა იმ არგუმენტით, რომ დოკუმენტი პერსონალურ მონაცემებს შეიცავდა.

„ბოლო სასამართლო სხდომაზე დავაყენეთ შუამდგომლობა და სასამართლოს ვთხოვეთ, რომ საქართველოს საგარეო საქმეთა სამინისტროსგან გამოეთხოვა ინფორმაცია ზურაბ დათუნაშვილთან დაკავშირებით. მოსამართლემ დაგვავალა, რომ წარგვედგინა ზუსტი თარიღი, თუ როდის მივიღეთ პასუხი საგარეო საქმეთა სამინისტროსგან. ეს დოკუმენტი ჩვენ უკვე მოვიპოვეთ და სასამართლო სხდომაზე ამას წარვადგენთ იმ იმედით, რომ სასამართლო ამ დოკუმენტს გამოითხოვს საგარეო საქმეთა სამინისტროსგან. ეს დაცვის მხარეს ძალიან დაგვეხმარება“, - თქვა ადვოკატმა.

რაც შეეხება კიდევ ერთ შუამდგომლობას, დაცვის მხარემ საქართველოს გენერალური პროკურატურიდან, ვაკე-საბურთალოს სამმართველოდან და პოლიციის განყოფილებებიდან გამოითხოვა ინფორმაცია, არის თუ არა ზურაბ დათუნაშვილი ანალოგიურ საქმეებზე დაკითხული ბრალდებულის ან მოწმის სახით.

„ვერც გენერალური პროკურატურისგან და ვერც ვაკე-საბურთალოს განყოფილებისგან მივიღეთ ინფორმაცია, ამიტომ იძულებულები ვართ, მივმართოთ სასამართლოს და ვთხოვოთ, დაგვეხმაროს ინფორმაციის გამოთხოვაში“, - განაცხადა ადვოკატმა.

ბერძნულ-რომაული სტილით მოჭიდავე ზურაბ დათუნაშვილის მიმართ ფიზიკური შეურაცხყოფის საქმეზე ფედერაციის პრეზიდენტის საქმეს სასამართლო განიხილავს.

საქმის წარმოება საქართველოს სისხლის სამართლის კოდექსის 126-ე მუხლის პირველი პუნქტით მიმდინარეობს, რაც ცემას ან სხვაგვარ ძალადობას გულისხმობს, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის დაზიანება.