ბახტაძემ, სერგეენკომ და გახარიამ პანკისის დაპირისპირებისას დაშავებულები მოინახულეს

საქართველოს პრემიერმინისტრმა მამუკა ბახტაძემ, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ და შინაგან საქმეთა მინისტრმა გიორგი გახარიამ პანკისში მომხდარი დაპირისპირებისას დაშავებულები მოინახულეს.

პრემიერის განცხადებით, ის, რაც პანკისის ხეობაში ხდებოდა, არის სრულიად მიუღებელი, რადგან ვცხოვრობთ თავისუფალ სახელმწიფოში და ყველას აქვს გამოხატვის თავისუფლება, თუმცა პოლიციის წინააღმდეგ ძალის გამოყენება მიუღებელია და კანონდარღვევას შესაბამისი სამართლებრივი პასუხი მოჰყვება.

„ჩვენ ვიხილეთ აგრესია სამართალდამცველებზე და ეს არის სრულიად მიუღებელი. ბუნებრივია, პასუხიც კანონის შესაბამისი იქნება“, - განაცხადა ბახტაძემ.

მისი განცხადებით, სახელმწიფოს არცერთ რეგიონში არ განუხორციელებია რაიმე ტიპის პროექტი მოსახლეობასთან კონსულტაციის და დოალოგის გარეშე. 

პრემიერმა მაღალი დონის თავშეკავებისთვის სამართალდამცველებს მადლობა გადაუხადა და განაცხადა, რომ გაკეთდა უსაფუძვლო კომენტარები, თითქოს საქართველოს არ სჭირდება ეკონომიკა.

ბახტაძის თქმით, საქართველოს ჰყავს ორი მტერი - სიღარიბე და ოკუპაცია, და სიღარიბის დაძლევის და ეკონომიკური ზრდის გზა სწორედ ჰესების მშენებლობაზე გადის. პრემიერმა მოქალაქეებს მოუწოდა, ნუ დაეყრდნობიან გადაუმოწმებელ ინფორმაციას.

„ნიუ ჰოსპიტალში“ ამ დროისთვის პანკისში მომხდარი დაპირისპირების დროს დაშავებული 2 სამართალდამცველი, ერთი პოლიციელი და ერთი სპეცრაზმელი იმყოფება.

21 აპრილს პანკისის ხეობაში მოქალაქეებმა ჰესის მშენებლობა გააპროტესტეს. პროტესტს პოლიციასა და აქციის მონაწილეებს შორის დაპირისპირება მოჰყვა. სპეცრაზმმა აქციის მონაწილეების წინააღმდეგ ცრემლმდენი გაზი გამოიყენა. ხეობაში მომხდარი დაპირისპირების გამო სამედიცინო დახმარება 55 ადამიანს გაეწია, მათ შორის 38 პოლიციელსა და 17 ადგილობრივს. შსს-მ პანკისის ხეობაში პოლიციელებზე თავდასხმისა და პოლიციის ტექნიკის დაზიანების ფაქტზე გამოძიება დაიწყო.