ცესკო: მთაწმინდის ოლქში არჩევნების მეორე ტური ჩატარდება

ცენტრალური საარჩევნო კომისიის პირველადი წინასწარი მონაცემებით, მთაწმინდაზე, თბილისის #1 მაჟორიტარულ საარჩევნო ოლქში პარლამენტის მაჟორიტარობის რიგგარეშე არჩევნების მეორე ტურის ჩატარება გახდა საჭირო. შესაბამისი მონაცემები კომისიის თავმჯდომარემ თამარ ჟვანიამ გამოაცხადა.

მთაწმინდის ოლქში გახსნილი 31 უბნიდან 27 უბნის მონაცემებით, პირველ ადგილზე „ქართული ოცნება ‐ დემოკრატიული საქართველოს” კანდიდატი ლადო კახაძე (41,28%), მეორეზე კი „ევროპული საქართველო ‐ თავისუფალი დემოკრატების“ კანდიდატი შალვა შავგულიძე (36,72%) გადის. შესაბამისად, მეორე ტურში ერთმანეთს სწორედ ისინი დაუპირისპირდებიან.

რაც შეეხება სხვა კანდიდატებს, ლევან იოსელიანი 6,43%-ს, ჰერმან საბო - 4,78%-ს, გრიგოლ გეგელია - 3,4%-ს, კობა დავითაშვილი - 2,87%-ს, სოფიო ხორგუანი კი - 2,58%-ს აგროვებს. დანარჩენი კანდიდატების მიერ დაგროვებული ხმები 1%-ს არ აღემატება.

მთაწმინდის მაჟორიტარი დეპუტატობისთვის ნიტა სიხარულიძე („ქრისტიან‐დემოკრატიული მოძრაობა” ), გიორგი ანდრიაძე („თავისუფალი საქართველო”), შალვა შავგულიძე („ევროპული საქართველო ‐ თავისუფალი დემოკრატები”), გიორგი ლილუაშვილი („საქართველო”), გიორგი შალიკაშვილი („მოძრაობა თავისუფალი საქართველოსთვის”), თებეა თენგიანი („ახალი ქრისტიან‐დემოკრატები”), მამუკა ტუსკაძე („მოძრაობა სოციალური სამართლიანობისათვის”), ვალისა ღვინჯილია („პოლიტიკური პლატფორმა ‐ ახალი საქართველო”), მიხეილ სალუაშვილი („სამართლიანობის აღდგენის კავშირი ხმა ერისა: უფალია ჩვენი სიმართლე”), ირმა რაზმაძე („თავისუფლება ‐ ზვიად გამსახურდიას გზა”), ჯემალ ნადარეიშვილი („საქართველოს ძალოვან ვეტერანთა და პატრიოტთა პოლიტიკური მოძრაობა”), გერმანე საბო („გირჩი”), ნოდარ ინანეიშვილი („ეროვნულ‐დემოკრატიული პარტია”), ვლადიმერ კახაძე („ქართული ოცნება ‐ დემოკრატიული საქართველო”), ლევან იოსელიანი (საინიციატივო ჯგუფი), კობა დავითაშვილი (საინიციატივო ჯგუფი), სოფიო ხორგუანი (საინიციატივო ჯგუფი), გრიგოლ გეგელია (საინიციატივო ჯგუფი), იოსებ კობერიძე (საინიციატივო ჯგუფი) და თამარ ალფაიძე (საინიციატივო ჯგუფი) იბრძოდნენ.

დღეს საქართველოში მერების რიგგარეშე, პარლამენტისა და საკრებულოს შუალედური არჩევნები გაიმართა. 410 საარჩევნო უბანზე 402 091 ამომრჩეველი იყო რეგისტრირებული. 

19 მაისის არჩევნებზე მონაწილე საარჩევნო სუბიექტების მიერ რეგისტრირებული იყო დაკვირვების უფლების მქონე 6 556 წარმომადგენელი.

საკრებულოს შუალედური არჩევნები საგარეჯოს, ახმეტის, ზესტაფონის, ჭიათურის, ტყიბულის, წყალტუბოსა და ოზურგეთის მუნიციპალიტეტში გაიმართა, მერი კი ხუთ მუნიციპალიტეტში მარნეულში, ზესტაფონში, ჭიათურაში, ზუგდიდსა და ხულოში აირჩიეს.