მთაწმინდაზე არჩევნების მეორე ტური 13 ივნისამდე გაიმართება

მთაწმინდის N1 საარჩევნო ოლქში, ცენტრალური საარჩევნო კომისია, შუალედური არჩევნების მეორე ტურს 13 ივნისამდე გამართავს. ამის შესახებ ცესკო-ს პრესსპიკერმა, ანა მიქელაძემ დღეს გამართულ შემაჯამებელ ბრიფინგზე განაცხადა. არჩევნების საბოლოო შედეგების დასათვლელად საოლქო საარჩევნო კომისიებს ვადა 30 მაისამდე აქვთ.

რაც შეეხება მთაწმინდის N1 საარჩევნო ოლქში მეორე ტურის გამართვის თარიღს, ანა მიქელაძემ განაცხადა, რომ კანონმდებლობის თანახმად, კენჭისყრის დღიდან, 25 დღის განმავლობაში უნდა ჩატარდეს მეორე ტური და მისი ჩატარების ბოლო ვადა არის 13 ივნისი.

„საარჩევნო პროცედურები გრძელდება. ახლა მიმდინარეობს როგორც საბოლოო შედეგების დამუშავების, ისე საჩივრების განხილვის პროცესი. კანონმდებლობის თანახმად, საოლქო საარჩევნო კომისიებმა უნდა შეაჯამონ კენჭისყრის შედეგები არაუგვიანეს კენჭისყრის დღიდან მე-11 დღისა, რაც არის არაუგვიანეს 30 მაისი. რაც შეეხება თარიღს, კენჭისყრის დღიდან, 25 დღის განმავლობაში უნდა ჩატარდეს მეორე ტური და მეორე ტურის ჩატარების ბოლო ვადა არის 13 ივნისი“, - განაცხადა მიქელაძემ. 

საქართველოში მერების რიგგარეშე, პარლამენტისა და საკრებულოს შუალედური არჩევნები 19 მაისს გაიმართა. 410 საარჩევნო უბანზე 402 091 ამომრჩეველი იყო რეგისტრირებული. 

19 მაისის არჩევნებზე მონაწილე საარჩევნო სუბიექტების მიერ რეგისტრირებული იყო დაკვირვების უფლების მქონე 6 556 წარმომადგენელი.

საკრებულოს შუალედური არჩევნები საგარეჯოს, ახმეტის, ზესტაფონის, ჭიათურის, ტყიბულის, წყალტუბოსა და ოზურგეთის მუნიციპალიტეტში გაიმართა, მერი კი ხუთ მუნიციპალიტეტში მარნეულში, ზესტაფონში, ჭიათურაში, ზუგდიდსა და ხულოში აირჩიეს.