დოლიძემ და ჯანეზაშვილმა განმარტეს რატომ არ შეიძლება მიქაუტაძე უზენაესის მოსამართლეობის კანდიდატი იყოს

იუსტიციის უმაღლესი საბჭოს არამოსამართლე წევრების, ნაზი ჯანეზაშვილისა და ანა დოლიძის განცხადებით, გიორგი მიქაუტაძის უზენაესი სასამართლოს მოსამართლეობის კანდიდატად ყოფნა დაუშვებელია. მათი განმცხადებით, დაუშვებელია უზენაესი სასამართლოს მოსამართლეობის შესარჩევ კონკურსში მიქაუტაძის კანდიდატად მონაწილეობა, რადგან ამით ჩრდილი ადგება იმ პროცესს, რომელიც მათი განცხადებით, ჩვენი ქვეყნის მართლმსაჯულების სისტემისთვის ისტორიული მნიშვნელობისაა.

ჯანეზაშვილმა და დოლიძემ ყურადღება გაამახვილეს იმ დარღვევებზე, რომლებიც მათი თქმით, გიორგი მიქაუტაძის კონკურსში მონაწილეობას უკავშირდება და განპირობებლულია ორი ძირითადი ფაქტორით:

1. მიქაუტაძე, როგორც იუსტიციის უმაღლესი საბჭოს მდივანი, კვლავ ინარჩუნებს იუსტიციის საბჭოს აპარატის მოქმედი ხელმძღვანელის სტატუსს, უზენაესი სასამართლოს კანდიდატების შესარჩევ კონკურსში კი აპარატი მნიშვნელოვან და კომპლექსურ საქმიანობას ახორციელებს. კერძოდ, სწავლობს კანდიდატების პროფესიულ რეპუტაციას და საქმიანობას, ამოწმებს წარდგენილ ინფორმაციას და ა.შ. არამოსამართლე წევრების თქმით, იქიდან გამომდინარე, რომ კანდიდატებს შორის დღეს თავად მიქაუტაძეა, მათი თქმით, გამოდის რომ მიქაუტაძის ხელმძღვანელობით მოქმედი აპარატი აგროვებს ინფორმაციას. 

2. გიორგი მიქაუტაძე, როგორც იუსტიციის უმაღლესი საბჭოს მდივანი, ვალდებულია ხელი მოაწეროს კანდიდატთა პირველი კენჭისყრის შედეგების ოქმს. მათი განმარტებით, გიორგი მიქაუტაძე, როგორც მოქმედი მდივანი, ვალდებულია ხელი მოაწეროს ოქმს, რომელიც მოკლე სიის შედგენას ეხება და ამავდროულად უარი უნდა თქვას კანდიდატობაზე.

"მიგვაჩნია, რომ დღეს შექმნილ ვითარებაში ერთადერთი გამოსავალი რჩება. მოვუწოდებთ იუსტიციის უმაღლესი საბჭოს მდივანს, დაიცვას მიუკერძოებლობის უმთავრესი პრინციპები უზენაესი სასამართლოს მოსამართლეობის კანდიდატურების შერჩევის პროცესში და შეასრულოს მასზე დაკისრებული შესაბამისი ვალდებულებები, რასაც შედეგად მისი მხრიდან უზენაესი სასამართლოს მოსამართლეობის კანდიდატობაზე უარის თქმა უნდა მოჰყვეს", - აცხადებენ ნაზი ჯანეზაშვილი და ანა დოლიძე.

უზენაესი სასამართლოს მოსამართლის ვაკანსიაზე განცხადებების მიღება 1 ივნისსდასრულდა. განცხადებების მიღება ელექტრონულად 11 მაისიდან 31 მაისის ჩათვლით მიმდინარეობდა.

როგორ აირჩევენ საქართველოს უზენაესი სასამართლოს მოსამართლეებს შეგიძლით იხილოთ ბმულზე.