გაეროს ელჩი საქართველოში პრაიდზე: ვიმედოვნებთ შსს უზრუნველყოფს ადამიანების უსაფრთხოებას

გაეროს განვითარების პროგრამის ხელმძღვანელმა საქართველოში, ლუიზა ვინტონმა „თბილისის პრაიდთან“ დაკავშირებით განაცხადა, რომ ლგბტ თემისა და საქართველოში არსებული სხვა უმცირესობათა უფლებების დასაცავად უფრო მეტის გაკეთებაა საჭირო.

მისი თქმით,  ლგბტ თემი საქართველოში ყოველდღიურად განიცდის დისკრიმინაციას, რაც გაეროს სპეციალური წარმომადგენლის დასკვნაშიც წერია, რომელსაც გაერო 24 ივნისს ჟენევაში წარადგენს.

"ვიმედოვნებთ, რომ შესაბამისი უწყებები, კერძოდ, შსს რომელსაც ნამდვილად გააჩნია ამის შესაძლებლობა და უნარი უზრუნველყოფს ადამიანების უსაფრთხოებას ამ კონკრეტული მარშის, თუ სხვა მსვლელობის დროს. დემოკრატია ნიშნავს იმას, რომ დაცულია არამხოლოდ უმრავლესობის უფლებები, არამედ სწორედ უმცირესობების უფლებებიც", - განაცხადა ლუიზა ვინტონმა.

თბილისში "თბილისის პრაიდის" კვირეული მიმდინარეობს, რომელსაც საზოგადოებაში მოწინააღმდეგეები ჰყავს. გაჟღერებული მუქარის მიუხედავად, პრაიდის ორგანიზატორები გეგმების შეცვლას არ აპირებენ. 

„ქართული მარში“ „თბილისი პრაიდის“ ორგანიზატორებს სიურპრიზს დაჰპირდა.

ბიზნესმენ ლევან ვასაძის თანამოაზრეებს, რომლებიც „თბილისი პრაიდის“ წინააღმდეგ გამოდიან, ვერის ბაღში „ქათული მარშის“ წევრები შეუერთდნენ და აქციის მონაწილეებს თანადგომა გამოუცხადეს.

ორგანიზაციის ლიდერმა, სანდრო ბრეგაძემ განაცხადა, რომ არც ერთ ქართველს არ აქვს უფლება ამ დროს განზე გადგეს. 

ლგბტ-პრაიდთან დაკავშირებით საპატრიარქომ უკვე მესამე განცხადება გაავრცელა. 17 ივნისს გავრცელებულ განცხადებაში ნათქვამი იყო, რომ ლგბტ მცირე ჯგუფის გამოყენება გარკვეული მიზნებისთვის არაერთ ძალას სურს.

14 ივნისს კი საპატრიარქომ მოუწოდა ხელისუფლებას, არ დაუშვას ლგბტ პრაიდის ჩატარება. ამის გამო, ლგბტ თემის წარმომადგენლებმა და მათმა უფლებადამცველებმა აქცია გამართეს. გაიმართა კონტრაქციაც. 

კონტრაქციაზე მივიდა ლევან ვასაძეც, რომელმაც განაცხადა, რომ პრაიდის ჩატარებას არც ერთ შემთხვევაში არ დაუშვებს. ამ ორ საპროტესტო აქციას, ერთმანეთისგან პოლიციის კორდონი ჰყოფდა.