მამუკა მდინარაძე: ვიცოდით რომ სხდომა ბერძენ კოლეგას უნდა წაეყვანა

ფრაქცია "ქართული ოცნების" თავმჯდომარის მამუკა მდინარაძის განცხადებით, გუშინ გვიან ღამე მან და სხვებმაც იცოდნენ, რომ დღევანდელი ასამბლეის სხდომა ბერძენ კოლეგას უნდა წაეყვანა. ამის შესახებ მდინარაძემ "ქრონიკის" ეთერში თქვა.

"პირადად ჩემთვის ძალიან მიუღებელია ის, რაც დღეს ვნახე, რადგან ყველაფერს რომ თავი დავანებოთ, შეურაცხმყოფელია. ძალიან მიხარია, რომ ჩვენი გუნდის აბსოლუტური უმრავლესობა ამ აზრზეა. ჩვენი ინფორმაცია ასეთი იყო, რომ ბერძენი სპიკერი, რომელიც გენერალური მდივანია ამ ორგანიზაციის, წაიყვანდა სხდომას. ისედაც დიდ უხერხულობას გვიქმნიდა  ის, რომ ფორმალური გარემოებებიდან გამომდინარე, რადგან ოკუპაციის შესახებ კანონი არ აქვს დარღვეული რუს დეპუტატს, ვერ აჩერებ საზღვარზე. ეს უხერხულობას ქმნიდა და გუშინაც გვეტყობოდა ეს უხერხულობა განცხადებებში. მაგრამ დღეს ახლა იქ რომ წამოსკუპდეს ვიღაცა, რომელიც საოცარ განცხადებებს აკეთებს ჩვენი ქვეყნის წინააღმდეგ და მტერია, ეს ყოვლად მიუღებელია", - განაცხადა მამუკა მდინარაძემ. 

რაც შეეხება მომხდარზე პასუხისმგებლობის საკითხს, მდინარაძე ამბობს, რომ ამ ღონისძიებას თავისი ორგანიზატორი ჰყავს, თუმცა ცხელ გულზე "ისრების სროლა არ სურს".

პარლამენტის სპიკერისთვის განკუთვნილი ადგილიდან, დელეგატებს ასამბლეის პრეზიდენტმა, რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

პარლამენტში მომხდარ ინციდენტთან დაკავშირებით ცოტა ხნის წინ ბაქოდან კომენტარი ირაკლი კობახიძემ გააკეთა.

საპარლამენტო ოპოზიცია ირაკლი კობახიძის პასუხისმგებლობის საკითხის დაყენებას და მის გადადგომას მოითხოვს. 

პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

მომხდარ ფაქტს გამოეხმაურა საქართველოს პრეზიდენტი სალომე ზურაბიშვილი, თამარ ჩუგოშვილი, არჩილ თალაკვაძე. რუსი დეპუტატის ქცევა "ევროპული საქართველოს" წევრებმაც გააპროტესტეს და მათ სპიკერატის ადგილი დაიკავეს.

ინციდენტის გამო პარლამენტის მიმდებარე ტერიტორიაზე საპროტესტო აქცია გაიმართა. 

თბილისი მართლმადიდებლობის საპარლამენტთაშორისო ასამბლეას მასპინძლობს. ღონისძიებაზე 25 ქვეყნის დელეგაციების წარმომადგენლები არიან ჩამოსულები.

მართლმადიდებლობის საპარლამენტთაშორისო ასამბლეის თავმჯდომარე სერგეი გავრილოვი, რომლის გამოჩენასაც საქართველოს პარლამენტში ვნებათაღელვა მოჰყვა, რუსეთის სახელმწიფო დუმაში კომუნისტურ პარტიას წარმოადგენს. ის რუსეთის პარლამენტის მეხუთე (2007), მეექვსე (2011) და მეშვიდე (2016-დან) მოწვევების წევრია.

მედიაში ვრცელდება ინფორმაცია, რომ გავრილოვი აფხაზეთის ომში სეპარატისტების მხარეს იბრძოდა, რასაც რუსი დეპუტატი კატეგორიულად უარყოფს. ასევე ვრცელდება ინფორმაცია, რომ გავრილოვი ნამყოფია დნესტრისპირეთში, კოსოვოსა და სირიაში, სადაც ასევე რუსეთის საპარლამენტო დელეგაციების შემადგენლობაში ჩადიოდა.

გავრილოვი ასევე არის ორგანიზაცია „საიმპერატორო მართლმადიდებლური პალესტინის საზოგადოების“ საბჭოს წევრი. აღსანიშნავია, რომ „საიმპერატორო მართლმადიდებლური პალესტინის საზოგადოების“ თავმჯდომარე გენერალ-პოლკოვნიკი, რუსეთის ყოფილი შს მინისტრი და პრემიერმინისტრი სერგეი სტეპაშინია.