თბილისის მოვლენებს რუსეთის საპატრიარქოც გამოეხმაურა

რუსეთის საპატრიარქოს სინოდის საზოგადოებასთან და მედიასთან ურთიერთობის განყოფილების ხელმძღვანელის ვლადიმერ ლეგოიდას განცხადებით, საქართველოში 20 ივნისს განვითარებული მოვლენები ქვეყნის საზოგადოებრივ-პოლიტიკურ ცხოვრებაში არსებული პრობლემების შედეგია, - ინფორმაციას რუსელი მედია ავრცელებს.   

„გუშინდელი მოვლენები იმ წინააღმდეგობების შედეგია, რაც საქართველოს საზოგადოებრივ-პოლიტიკურ ცხოვრებაში არსებობს. მისივე თქმით, მართლმადიდებლობის საპარლამენტთაშორისო ასამბლეის სხდომა ამ წინააღმდეგობების გამწვავების და შემდეგ კი საზოგადოებრივი აფეთქების მხოლოდ საბაბი გახდა. დიდი იმედი გვაქვს, რომ წარმოქმნილი კონფლიქტი მალე და მშვიდობიანად მოგვარდება“, - განაცხადა ლეგოიდამ. 

მისი თქმით, 20 ივნისს საქართველოს პარლამენტში არასათანადოდ იყო მომზადებული სივრცე, სადაც მიმდინარეობდა საპარლამენტთაშორისო ასამბლეის სხდომა.

20 ივნისს რუსთაველის გამზირზე აქცია მას შემდეგ დაიგეგმა, რაც გუშინ დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა და "ქართული ოცნების" წევრ ზაქარია ქუცნაშვილს მოწვევისთვის მადლობა გადაუხადა.

საპარლამენტო ოპოზიცია ირაკლი კობახიძის პასუხისმგებლობის საკითხის დაყენება და მის გადადგომას მოითხოვა. პარლამენტში მომხდართან დაკავშირებით განცხადება გაავრცელა ბიძინა ივანიშვილმა და პრემიერმა მამუკა ბახტაძემ, ასევე განცხადება გააკეთეს ირაკლი ღარიბაშვილმა და კახა კალაძემ. 

პარლამენტში მართლმადიდებლობის საპარლამენტთაშორისო ასამბლეის მიმდინარეობა შეწყდა. ზაქარია ქუცნაშვილმა კი მოიბოდიშა და თქვა, რომ ასამბლეის ჩასატარებლად არასწორი ადგილი შეარჩიეს.

რუსეთის დელეგაციამ, მათ შორის სერგეი გავრილოვმა საქართველო დატოვა.