სალომე ზურაბიშვილი: რუსეთმა ოკუპაცია მოახდინა და ამავდროულად ცდილობს შეგვაშინოს

საქართველოს პრეზიდენტმა სალომე ზურაბიშვილმა BBC-ის მსოფლიო ახალი ამბების სამსახურის მთავარ საინფორმაციო ანალიტიკურ გადაცემაში Newshour პარლამენტთან განვითარებულ მოვლენებზე ილაპარაკა.

„ეს იყო ქართველი ხალხის პროტესტი რუსეთის ქმედებების გამო. მეზობელი ქვეყნის რომელმაც ოკუპაცია მოახდინა და ამავდროულად ცდილობს შეგვაშინოს. ახლაც პუტინმა ხელი მოაწერა და საქართველოსთან საჰაერო მიმოსვლა დროებით აკრძალა. 

ქართველი ხალხის რეაქცია ბუნებრივი და სპონტანური იყო. პრობლემა ისაა, რომ მცირე ჯგუფი ცდილობს გამოიყენოს ეს პროტესტი თავისი პოლიტიკური მიზნებისთვის. დესტაბილიზაცია მოახდინოს ქვეყანაში. უნდოდათ აეღოთ პარლამენტი,  ამას მოჰყვა პოლიციის რეაქცია, რომელიც მშვიდად იყო მთელი საღამო,"- ამბობს ზურაბიშვილი.

მისივე თქმით, მას მოსკოვში აკრიტიკებენ. კერძოდ, რუსეთის პრემიერმინისტრმა საქართველოს პრეზიდენტის განცხადებას უპასუხა, რომელმაც მოსკოვი ქვეყანაში საპროტესტო აქციების ორგანიზებაში დაადანაშაულა. დიმიტრი მედვედევის თქმით, სალომე ზურაბიშვილის ასეთი განცხადებები არაპროფესიონალურია და ის ან საქმის კურსში არ არის, ან ვითარებას ამახინჯებს.

საქართველოში ახლა უმთავრესი სტაბილურობაა, ქვეყნის სტაბილურობა კი სწორედ შინაგან საქმეთა მინისტრს უკავშირდება, რადგან ის საკმაოდ პატივცემული პიროვნებაა, - ასე უპასუხა საქართველოს პრეზიდენტმა კითხვას თბილისში განვითარებული მოვლენების ფონზე რატომ რჩება შს მინისტრი თანამდებობაზე.

"რუსეთისთვის რეგიონში ერთ-ერთი უმთავრესი პრობლემა საქართველოს სტაბილურობაა. საქართველოს სტაბილურობა კი შინაგან საქმეთა მინისტრთან არის დაკავშირებული, რომელიც საკმაოდ პატივცემული პიროვნებაა. უცნაურია, რომ ეს ყველაფერი ხდება მაშინ, როდესაც რეგიონში ირანსა და ამერიკის შეერთებულ შტატებში შორის ვითარება დაძაბულია. ხვალ სტამბოლში არჩევნები იმართება. საქართველო ევროპისკენ სტაბილურად მიიწევს. შემდეგ თვეში კი, ევროკავშირთან პარტნიორობის საკმაოდ მნიშვნელოვანი კონფერენცია იმართება. სწორედ ასეთ პერიოდში არის ვითარების დესტაბილიზაციის მცდელობები. სწორედ ამას უნდა მივაქციოთ ყურადღება. ნათელია, რომ რუსეთი ცდილობს, ძირი გამოუთხაროს ქვეყანას, რომელმაც იცის, საით მიდის და აქვს მკაფიო ევროატლანტიკური პერსპექტივა. სწორედ ამიტომ გასაკვირი არის არის, რომ რუსეთისთვის ოკუპანტის წოდების გამო, ბატონმა მედვედევმა გამაკრიტიკა“,- განაცხადა საქართველოს პრეზიდენტმა.

თბილისში პარლამენტთან საპროტესტო აქცია დღეს 19:00 საათზეა დადეგმილი.  აქციაზე დაკავებული პირების გათავისუფლებასა და შს მინისტრის გიორგი გახარიას პასუხისმგებლობის საკითხის დაყენებას მოითხოვენ. 

გიორგი გახარიას თქმით, პოლიციამ ბოლომდე გამოიყენა თმენის ვალდებულება, ვიდრე ადამიანების სიცოცხლეს არ დაემუქრა საფრთხე. 

მანამდე „ქართული ოცნების“ ოფისში პოლიტსაბჭოს დასრულების შემდეგ ოფიციალურად გახდა ცნობილი, რომ ირაკლი კობახიძემ თანამდებობა დატოვა. ამასთან, ზაქარია ქუცნაშვილი სადეპუტატო მანდატს ტოვებს. 

შსს-ში გამართულ ბრიფინგზე ცნობილი გახდა, რომ უგულავას, მელიასა და ოქრუაშვილს ჯგუფური ძალადობის ორგანიზების საქმეზე გამოკითხავენ. 

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

სამედიცინო დაწესებულებებში გადაყვანილი 240 პაციენტიდან საავადმყოფოებში რჩება 55. 240-დან 80 იყო პოლიციელი. შსს-ს ინფორმაციით, სხვადასხვა სამართალდარღვევისთვის დაკავებულია აქციის 305 მონაწილე.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.