„პატრიოტთა ალიანსი“ მოსკოვში დაგეგმილ ფორუმზე მონაწილეობას უარყოფს

"პატრიოტთა ალიანსის" ფრაქციის თავმჯდომარე გიორგი ლომია უარყოფს ინფორმაციას იმის თაობაზე, რომ ალიანსის წევრები მოსკოვში ჩასვლას და ფორუმში მონაწილეობას გეგმავენ. როგორც გიორგი ლომია აცხადებს, მოწვევა "პატრიოტთა ალიანსმა" მართლაც მიიღო, მაგრამ საერთაშორისო საპარლამენტო ფორუმში მონაწილეობას არც მანამდე აპირებდნენ.

მათი ინტერესი, როგორც ლომია განმარტავს ფორუმის ფარგლებში მიმდინარე შეხვედრები იყო როგორც აფხაზურ, ისე ოსურ მხარესთან. ფრაქციის თავმჯდომარე განმარტავს, რომ ის მოსკოვში გამგზავრებას, მხოლოდ ამ მიზნით გეგმავდა. 

"სოხუმთან და ცხინვალთან დიალოგი რომ აუცილებელია ამაზე ვთანხმდებით, იმ ხალხთან მე პირადად მქონდა დაგეგმილი შეხვედრა, მაგრამ იმ ყველაფერის შემდეგ, რაც მოხდა საქართველოში ბუნებრივია, რომ ეს ყველაფერი ჩაიშალა", - თქვა გიორგი ლომიამ. 

კითხვაზე "ხედავს თუ არა განვითარებულ მოვლენებში რუსულ კვალს?", ლომია განმარტავს, რომ ნაკლებად ხედავს და ეს არის კარგად დაგეგმილი და ორგანიზებული სპექტაკლი, რომელშიც მონაწილეობდნენ როგორც "ქართული ოცნების", ისე "ევროპული საქართველოს" და "ნაციონალური მოძრაობის" წარმომადგენლები. 

"როგორ შეიძლება გავრილოვს ორი წელიწადი ეპატიჟებოდე საქართველოში, ბერძენი ადამიანი იღებს თავის თავზე ღონისძიების წაყვანას და უცბად, ქართული მხარე ეუბნება, რომ თქვენ უნდა დაჯდეთ წამყვანად", - კითხულობს ლომია.

"პატრიოტთა ალიანსის" ფრაქციის თავმჯდომარე ამბობს, რომ ერთადერთი, რასაც ადა მარშანია და ემზარ კვიციანი აპროტესტებდნენ იყო ის, რომ არც გავრილოვი უნდა მჯდარიყო პარლამენტის თავმჯდომარის სკამზე და არც ის ადამიანები, ვინც კოდორის ხეობა და ახალგორი ჩააბარეს რუსეთს.

სახელმწიფო დუმის დსთ-ს საქმეთა კომიტეტის თავმჯდომარემ ლეონიდ კალაშნიკოვმა განაცხადა, რომ ქართველი პარლამენტარები მოსკოვში ივლისის დასაწყისში დაგეგმილ „პარლამენტარიზმის განვითარების“ ფორუმზე აპირებენ ჩასვლას.

20 ივნისს მართლმადიდებლობის საპარლამენტთაშორისო ასამბლეის წევრებს პარლამენტის თავმჯდომარისთვის განკუთვნილი ადგილიდან სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რამაც გაღიზიანება გამოიწვია და ასამბლეის მიმდინარეობა შეწყდა. ამას მოჰყვა საპროტესტო აქცია. 20 ივნისს პარლამენტის წინ სპეცრაზმმა რამდენჯერმე გამოიყენა ცრემლმდენი გაზი და რეზინის ტყვიები, ბოლოს კი საპროტესტო აქცია წყლის ჭავლით დაშალა.

მომხდარის გამო თანამდებობა პარლამენტის სპიკერმა ირაკლი კობახიძემ დატოვა. სადეპუტატო მანდატი დატოვა ასამბლეის ორგანიზატორმა ზაქარია ქუცნაშვილმა.

რუსთაველის გამზირზე აქციის მონაწილეებსა და სპეცრაზმს შორის მომხდარი დაპირისპირებისას 300-მდე ადამიანი დაშავდა, აქედან 80 პოლიციელი იყო. მათი ნაწილი სამედიცინო დაწესებულებებში ამ დრომდე მკურნალობს.

რუსეთის პრეზიდენტმა ბრძანებას მოაწერა ხელი, რომლის თანახმადაც 8 ივლისიდან რუსულ ავიაკომპანიებს საქართველოში რუსეთის მოქალაქეების გადაყვანა ეკრძალებათ. გარდა ამისა, პუტინმა რუსეთის ხელისუფლებას საქართველოში მყოფი რუსეთის მოქალაქეების სამშობლოში დაბრუნების უზრუნველყოფა დაავალა.

გასული წლის ივლისში „პატრიოტთა ალიანსის“ წევრები მოსკოვში დუმის დეპუტატებს შეხვდნენ. როგორც ირმა ინაშვილმა განაცხადა, რუსეთის სათათბიროში შეხვედრას გარდამტეხი შედეგები მოჰყვა.

რუსული მედიით გავრცელებული ინფორმაციის თანახმად, შეხვედრის შემდეგ, მიიღეს გადაწყვეტილება, რომ საქართველო-ნატო-რუსეთის ურთიერთობის სამუშაო ჯგუფი შეიქმნას.