ბახტაძე: ნაციონალები ელოდებოდნენ რომ ფეხი დაგვიცდებოდა და სამწუხაროდ, ფეხი დაგვიცდა

„წლების განმავლობაში ნაციონალები ჩასაფრებულები ელოდებოდნენ რომ ფეხი დაგვიცდებოდა და სამწუხაროდ, ფეხი დაგვიცდა“, - განაცხადა საქართველოს პრემიერმინისტრმა სპეციალურად გამართულ ბრიფინგზე 20 ივნისის მოვლენების შეფასებისას.

ბახტაძემ პასუხისმგებლობა ექსპრეზიდენტ სააკაშვილს და მის თანამოაზრეებს დააკისრა და აღნიშნა, რომ სწორედ მსჯავრდებულმა სააკაშვილმა და მისმა გუნდმა გამოიყენა საზოგადოების გულწრფელი პროტესტი. 

„ჩვენ ვისმენთ ერთიდაიგივეს - ეს არის აგრესია, შეტევა კონსტიტუციაზე. ყველანაირი მცდელობა, რომ მოხდეს ქართული საზოგადოების კიდევ უფრო პოლარიზაცია. 7 წელია, ისინი ჩაუსაფრდნენ საკუთარ სამშობლოს და საკუთარ ქვეყანას. ნაციონალები ელოდებოდნენ რომ ფეხი დაგვიცდებოდა და სამწუხაროდ, ფეხი დაგვიცდა“, - თქვა პრემიერმა. 

მისივე თქმით, სრულიად მიუღებელი იყო ის, რაც მოხდა 20 ივნისს. 

„ვიხილეთ გულწრფელი პროტესტი თითოელი ადამიანის, თუმცა ასევე ვიხილეთ, რომ დესტრუქციული ოპოზიცია ცდილობდა, ეს გულწრფელი პროტესტი გამოეყენებინა პროვოკაციისთვის“.

ბახტაძის თქმით, რამდენიმე საათის განმავლობაში პოლიციას ფიზიკურად უსწორდებოდნენ და პასიურმა კორდონმა ვერ უზრუნველყო უსაფრთხოება და მოუწიათ შესაბამისი ზომების გატარება. 

პარლამენტის წინ დღეს აქცია შს მინისტრის გადადგომის მოთხოვნით განახლდება. აქციის მონაწილეები მმართველი პარტიის ლიდერის ივანიშვილის სახლისკენ გეგმავენ მსვლელობის მოწყობას. 

რუსთაველის გამზირზე პროტესტის მეექვსე დღეს აქციის მონაწილეებმა პერფორმანსი გამართეს, როდესაც მარცხენა თვალი წითელი ნაჭრებით აიხვიეს, რის შემდეგაც აქციაზე საქართველოს ჰიმნი შესრულდა.

პროტესტის მონაწილეთა მოთხოვნებში შედიოდა პროპორციული არჩევნები, აქციის დაშლის შემდეგ დაკავებული ყველა ადამიანის გათავისუფლება. ასევე უკვე მთავარი მოთხოვნაა შს მინისტრის გიორგი გახარიას გადადგომა, რადგან პროტესტის მონაწილეთა შეფასებით, სწორედ ის არის პასუხისმგებელი აქციის დაშლისას დაზარალებულთა მდგომარეობის გამო.

„ქართული ოცნება“ კი პასუხისმგებლობას „დესტრუქციულ ოპოზიციას“ აკისრებს. მმართველი გუნდის შეფასებით, სწორედ „ნაციონალური მოძრაობის“ ლიდერებმა წააქეზეს აქციის მონაწილეები. 

24 ივნისს, პარტია „ქართული ოცნების“ თავმჯდომარე ბიძინა ივანიშვილი გამოვიდა ინიციატივით, რომ 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდეს. 

რაც შეეხება დაკავებულებს, პატიმრობაში რჩება 3 ადამიანი.  51 - პატიმრობიდან გაათავისუფლეს.