მდინარაძე: უმრავლესობა მყარად დგას, არ დაიშლება, „ნაცმოძრაობას“ ოცნება არ შეუსრულდება

„ნაციონალური მოძრაობის“ ოცნებაა, აქციებმა მთელი ქვეყანა მოიცვას, - ამის შესახებ მამუკა მდინარაძემ „ქართული ოცნების“ ოფისში საპარლამენტო უმრავლესობის სხდომის დასრულების შემდეგ განაცხადა. 

მდინარაძის განცხადებით, ამ პარტიის ოცნება საპარლამენტო უმრავლესობის დაშლაც არის, თუმცა უმრავლესობა არ დაიშლება. 

„ყველაზე მთავარი, რაც დღეს არის და რა ოცნებაც არ შეუსრულდება „ნაციონალურ“ მოძრაობას“ და მის სატელიტებს - უმრავლესობა არავითარ შემთხვევაში არ დაიშლება. ვთანხმდებით მთავარზე, რომ უმრავლესობაში არ იყოს რყევები. სხვადასხვა მედიასაშუალებაში რაღაცნაირად ავრცელებენ ინფორმაციას, რომელიც ამის დასადასტურებლად მოჰყავთ, თუმცა უმრავლესობა არ დაიშლება, ამის გარანტიას გაძლევთ. უმრავლესობა მყარად არის, ჩვენ ვთანხმდებით, რომ გუნდში განსხვავებული მოსაზრებების მიუხედავად, ამ საკითხს არანაირი საფრთხე არ შეეხება“, - განაცხადა მამუკა მდინარაძემ.

მისივე თქმით, „ნაციონალური მოძრაობის“ ოცნებაა ქაოსი, თუმცა მარგინალური ჯგუფები და მეორადი „კმარელები“ სახელმწიფოს სტაბილურობას ვერ შეარყევენ.

რაც შეეხება დიმიტრი ხუნდაძის ინიციატივას, მამუკა მდინარაძის განცხადებით, შეუძლებელია, სრულად მაჟორიტარულ სისტემაზე გადასვლის იდეამ პარლამენტში მხარდაჭერა მოიპოვოს.

„ისინი ამბობენ - ჩვენ გავალთ ხალხში, შევაგროვებთ ხელმოწერებს, კი ბატონო, მათ ამის უფლება აქვთ, მაგრამ სიურპრიზებს არ უნდა ველოდოთ, მე არ ვფიქრობ, რომ შეგროვდება მილიონი ადამიანის ხელმოწერა, შემდეგ წარმოადგენენ ამას პარლამენტში და გვაიძულებენ, რომ გადავიდეთ ე.წ. ამერიკულ სისტემაზე, ყველა მსგავსი სისტემა, სრულად მაჟორიტარული, შერეული, პროპორციული - ყველა მათგანი მუშაობს განვითარებულ დემოკრატიულ ქვეყნებში. შეუძლებელია პარლამენტში დღეს მხარდაჭერა მოიპოვოს სრულად მაჟორიტარულ სისტემზე გადასვლის იდეამ. საქართველოს პარლამენტში დღეს კონსტიტუციური ცვლილებების რესურსი არ არსებობს, მითუმეტეს, თუ საუბარი იქნება სრულად მაჟორიტარულ სისტემაზე გადასვლაზე“, - განაცხადა მდინარაძემ.

„ქართული ოცნების“ ოფისში უმრავლესობის სხდომა გაიმართა. ერთ-ერთი განსახილველი საკითხი საარჩევნო სისტემა, მათ შორის მაჟორიტარი დეპუტატების ნაწილის მიერ მომზადებული ის კანონპროექტი იყო, რომელიც სრულად მაჟორიტარული სისტემის ამოქმედებას ეხება.

ინიციატივის ერთ-ერთი ავტორის, გურამ მაჭარაშვილის განცხადებით, მათ მიერ მომზადებული კანონპროექტი ამერიკული მოდელია, რომლის მიხედვითაც, პარლამენტი ორპალატიანი გახდება და დეპუტატები მაჟორიტარული პრინციპით აირჩევიან.

მაჟორიტარ დეპუტატთა ეს ნაწილი ხელმოწერების შეგროვებას იწყებს. საკანონმდებლო ცვლილებები მათ უკვე მოამზადეს. ინიცირებისათვის 200 ათასი ამომრჩევლის ხელმოწერაა საჭირო.

4 დეკემბერს უმრავლესობაში შეხვედრა გამართეს, სადაც 2020 წლის შემდეგ სრულად მაჟორიტარულ სისტემაზე გადასვლასთან დაკავშირებით იმსჯელეს. როგორც შეხვედრის შემდეგ დიმიტრი ხუნდაძემ თქვა, პარლამენტში 10-მა ადამიანმა, მაჟორიტარულ სისტემასთან დაკავშირებით, საინიციატივო ჯგუფი დაარეგისტრირა. ხუნდაძემ ასევე აღნიშნა, რომ უმრავლესობის ლიდერი მამუკა მდინარაძე ამ საკითხის პრინციპული წინააღმდეგია.

საარჩევნო სისტემის შესაცვლელად პარლამენტში კანონპროექტი ოპოზიციასაც აქვს დარეგისტრირებული. 

„ქართული ოცნებისა“ და ოპოზიციური პარტიების წარმომადგენლების შეხვედრა სასტუმრო „ბილტმორში“ 30 ნოემბერს გაიმართა.  მას დიპლომატიური მისიების წარმომადგენლებიც ესწრებოდნენ. მხარეებმა მიმდინარე პოლიტიკური საკითხები განიხილეს. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.