ოპოზიციამ საარჩევნო სისტემის შესაცვლელად პარლამენტში კანონპროექტი დაარეგისტრირა

30 ოპოზიციური ძალის ავტორობით შექმნილი კანონპროექტი 2020 წლის საპარლამენტო არჩევნების შერეული სისტემით ჩატარებას ითვალისწინებს. „კანონპროექტი გულისხმობს ხმების პროპორციულ განაწილებასაც და მრავალმანდატიან მაჟორიტარულ ოლქებსაც“, - აცხადებს „ევროპული საქართველოს“ წევრი სერგი კაპანაძე.

„ოპოზიციურმა პარტიებმა პარლამენტში შევიტანეთ კანონპროექტი, რომელიც გულისხმობს ე.წ. გერმანულ მოდელს. ეს არის პროექტი, რომელიც საარჩევნო სისტემის რეფორმას ითვალისწინებს. მასში გათვალისწინებულია გერმანული პრინციპი, რაც გულისხმობს, რომ ყველა პარტია ისე იქნება პარლამენტში წარმოდგენილი, რა პროპორციის ხმებსაც მიიღებს მოსახლეობისგან და ასევე, გულისხმობს მრავალმანდატიან მაჟორიტარულ ოლქებს. კანონპროექტის ინიციატორები არიან საპარლამენტო ფრაქციები: „ნაციონალური მოძრაობა“ და „ევროპული საქართველო, ხოლო მისი ავტორია 30 პოლიტიკური ძალა და მათი წარმომადგენლობა. ასე რომ, სრული კონსენსუსია ოპოზიციურ ფლანგზე. ახლა ბურთი „ქართული ოცნების“ მოედანზეა და მათ თუ სურთ ამ ძალიან მწვავე პოლიტიკური კრიზისიდან გამოსავლის მოძებნა, ეს არის გამოსავალი,” - განაცხადა სერგი კაპანაძემ.

გაერთიანებული ოპოზიციის მიერ პარლამენტში საარჩევნო სისტემის შესახებ კანონპროექტის დარეგისტრირების შესახებ 3 დეკემბერს „ახალი საქართველოს“ ლიდერმა, გიორგი ვაშაძემ განაცხადა.

ვაშაძის თქმით, ოპოზიცია „გერმანული მოდელის“ ქართულ მოდიფიკაციას სახალხო დამცველსაც გადაუგზავნის, რომელიც მას თავის მხრივ, საერთაშორისო ორგანიზაციებს გააცნობს.

მანამდე ევროკავშირის ელჩი საქართველოში, კარლ ჰარცელი ქვეყანაში არსებულ მდგომარეობას გამოეხმაურა. მისი თქმით, მთავრობასა და ოპოზიციას შორის მოლაპარაკებების შემდეგი ეტაპი შეძლებისდაგვარად სწრაფად უნდა გაიმართოს.

„ქართული ოცნებისა“ და ოპოზიციური პარტიების წარმომადგენლების შეხვედრა სასტუმრო „ბილტმორში“ 30 ნოემბერს გაიმართა.  მას დიპლომატიური მისიების წარმომადგენლებიც ესწრებოდნენ. მხარეებმა მიმდინარე პოლიტიკური საკითხები განიხილეს. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.