აკაკი ბობოხიძე: ვიღაცამ გახარიას მოლაპარაკება აუკრძალა და აქციის დარბევა უბრძანა

შინაგან საქმეთა მინისტრის გიორგი გახარიას განცხადებებს შეფასებები მოჰყვა ოპოზიციაში. როგორც „ევროპული საქართველოს” წევრმა, აკაკი ბობოხიძემ თქვა, გახარიას მოლაპარაკებები აუკრძალეს და დარბევის დაწყება უბრძანეს.

"გიორგი გახარიამ გუშინ დაადასტურა ყველაზე უფრო მნიშვნელოვანი რამ, რომ მოლაპარაკებაზე შემოთავაზება სწორედ მისგან მოდიოდა. არაბუნებრივია და გაუგებარია, როდესაც ადამიანი მოლაპარაკებაზე გიწვევს და შეხვედრაზე ჩემი შუამავლობით თანხმობას ღებულობს, რატომ გასცემს დარბევის ბრძანებას 10 წუთის შემდეგ. ამ ფაქტს ახსნა ვერ მოეძებნება. მხოლოდ ერთი ახსნა შეიძლება არსებობდეს; გახარიას მოლაპარაკება ვიღაცამ აუკრძალა და ვიღაცამ უბრძანა, დაუყოვნებლივ დაეწყო აქციის დარბევა იმ მომენტში, როდესაც ძიძგილაობა უკვე შეწყვეტილი იყო.

როგორც ჩანს, ეს გადაწყვეტილება ბიძინა ივანიშვილმა მიიღო. მას მოლაპარაკებების დაწყება აუკრძალეს და დარბევის დაწყება უბრძანეს. სწორედ ეს არის მიზეზი, რომ გახარია ვერ ბედავს და იმას ვერ ამბობს, თუ ვინ გასცა ბრძანება. გახარია საქართველოს უახლოეს ისტორიაში ივანიშვილს ხელს ვერ და არ დაადებს. ასევე, ეს არის მიზეზი, თუ რატომ არ არის გადამდგარი გახარია დღეს. ბიძინა ივანიშვილს ამ პასუხისმგებლობის აღება და გახარიას გაშვება მოუწევს. ეტყობა, აქციის დარბევაზეც და მოლაპარაკების შეწყვეტაზეც გადაწყვეტილება ბიძინა ივანიშვილმა მიიღო. ბიძინა ივანიშვილმა თავისი დამღა გახარიას დაარტყა და ამ დამღას სახელად „ჯალათი” ჰქვია. გახარია მთელი ცხოვრება ამ დაღლით ივლის”, - განაცხადა ბობოხიძემ.

შტურმის დაწყებამდე მოლაპარაკებები იმიტომ ვერ შედგა, რომ მეორე მხარემ პროცესის მართვა ვერ შეძლო, - ამის შესახებ შინაგან საქმეთა მინისტრმა გიორგი გახარიამ ტელეკომპანიების წარმომადგენლებთან შეხვედრაზე განაცხადა.

26 ივნისს გავრცელდა ინფორმაცია, რომ 20 ივნისს საპროტესტო აქციის დაშლამდე ხელისუფლებას და ოპოზიციის ლიდერებს შორის მოლაპარაკების ორგანიზებაში შუამავლის როლს „გირჩის“ დამფუძნებელი და წარსულში „ნაციონალური მოძრაობის“ ერთ-ერთი ლიდერი პავლე კუბლაშვილი ასრულებდა, თუმცა მოლაპარაკება არ შედგა.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.