წულუკიანი: არავის გადადგომა არ იგეგმება

არსებობს ე.წ. პროპორციულობის ტესტი, რომელიც უნდა დააკმაყოფილოს არა კოლექტიურად პოლიციამ, არამედ თითოეულმა სამართალდამცველმა, ინდივიდუალურად, - განაცხადა იუსტიციის მინისტრმა თეა წულუკიანმა 20 ივნისის მოვლენების შეფასებისას. 

მისი თქმით, მიზანი, რისთვისაც ძალა იყო გამოყენებული, იყო ლეგიტიმური. კითხვის ნიშნები კი არის, იყო თუ არა ძალის გადამეტება ინდივიდუალურ შემთხვევებში. 

წულუკიანის განცხადებით, როდესაც აქციამ მშვიდობიანი ხასიათი დაკარგა და პარლამენტზე შეტევა მიიტანეს, მისი მოგერიების მიზანი იყო ლეგიტიმური არა მარტო ჩვენი კანონმდებლობით. ამის შემდეგ კი დგება პროპორციულობის შემოწმების პროცესი, რაც გამოძიების საქმეა. 

„როდესაც იგერიებენ სახელმწიფო ინსტიტუტზე თავდასხმას, რა თქმა უნდა გაიცემა ბრძანებები, ან კიდევ ბრძანებებთან ერთად კონკრეტული ადამიანები, ან სამართალდამცველები უფლებამოსილნი არიან, რომ საფრთხის ხარისხიდან გამომდინარე თავადაც მიიღონ გადაწყვეტილებები.

ვინ გასცა ბრძანება ამა თუ იმ სპეციალური საშუალების გამოსაყენებლად, როდის, იქნებოდა ეს ადგილზე მყოფი პოლიციელი თუ სპეციალური წარმომადგენელი, რა გადაწყვეტილება მიიღო და რა საფრთხე დაინახა ამა თუ იმ ადამიანში, ეს უნდა იყოს გამოძიების თემა. 

გუშინ ჩვენ ვუსმინეთ შს მინისტრს და ის არ გაურბის არანაირ პასუხისმგებლობას -ჩემთვის ის ინტერვიუ, რომელიც მან გუშინ მისცა, სწორედ ამას ნიშნავდა.

შესაბამისად, ვერ დაგეთანხმებით იმაში, რომ ვინმე პასუხისმგებლობას გაურბის. გვარები და სახელები, ვინ რა ბრძანება გასცა, ეს მე არ ვიცი და ეს უნდა დაადგინოს გამოძიებამ. სავარაუდოდ, ეს არ იყო ერთი ბრძანება, ეს იყო რამდენიმე ბრძანება, ან ხანდახან რისი უფლებაც აქვს საფრთხესთან მებრძოლ ადამიანს, ინდივიდუალური გადაწყვეტილება და ამისთვის გვჭირდება სწორედ გამოძიება“, - განაცხადა თეა წულუკიანმა. 

მისივე თქმით, გიორგი გახარიას გადადგომა არ იგეგმება. „დღეს ქვეყანაში ანთია, დიდი არა, მაგრამ ცეცხლი - მე ჩემს სიტყვებს ვზომავ, რადგან მიკავია ეს თანამდებობა და არ მომივიდეს ისე, რომ ცეცხლზე ნავთი დავასხა. მესმის, რომ ეს ზოგიერთისთვის სულ ერთია, ჩემთვის - არა. შესაბამისად, ოკუპანტი ქვეყნის მოქალაქე არ უნდა ყოფილიყო იქ, სადაც იყო - ამას ვამბობ ძალიან რბილად. ამისთვის გადადგა ქვეყანაში რიგით მეორე პირი, ჯობდა უფრო ადრე, მაგრამ გადადგა“, - განაცხადა თეა წულუკიანმა.  

აქციის მონაწილეების მთავარ მოთხოვნად რჩება შს მინისტრის გიორგი გახარიას გადადგომა, რადგან პროპორციული არჩევნებისა და აქციის დაშლისას დაკავებულთა გათავისუფლების შესახებ მოთხოვნა დაკმაყოფილებულია.

აქცია პარლამენტის წინ დღეს ისევ 19:00 საათზე განახლდება. პროტესტის მონაწილეებმა მმართველი პარტიის ლიდერის ბიძინა ივანიშვილის სახლთან გუშინ წარადგინეს საკუთარი მოთხოვნა, როდესაც რუსთაველის გამზირიდან მსვლელობა სწორედ ამ მიმართულებით მოაწყვეს. 

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები. 

ამას კი წინ უძღოდა პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებისადმი რუსეთის დუმის კომუნისტური პარტიის წევრის სერგეი გავრილოვის მიმართვა, რასაც საკანონმდებლო ორგანოსთან საპროტესტო აქცია მოჰყვა.