ზალკალიანმა განმარტა რატომ გაავრცელა მისმა უწყებამ განცხადება გაბუნიას მონოლოგზე

საგარეო საქმეთა მინისტრმა განმარტა, რატომ გაავრცელა მისმა უწყებამ განცხადება ტელეწამყვან გიორგი გაბუნიას მონოლოგზე. 

ამის შესახებ მინისტრმა „ქრონიკის“ ეთერში განაცხადა. 

ზალკალიანი მიიჩნევს, რომ არა მარტო საგარეო უწყების, არამედ მთლიანად ხელისუფლების რეაქცია იყო დროული, ზუსტი და ადეკვატური, ამის საფუძველი კი გახდა ჟურნალისტის პროვოკაციული, დესტრუქციული მონოლოგი, რომელიც ჟურნალისტურ სტანდარტებს არ შეესაბამებოდა.  

საგარეო უწყების ხელმძღვანელს ყოფილი კოლეგების კრიტიკაც უკვირს და არც ერთ გამოთქმულ კრიტიკას არ იღებს. 

რუსეთის პრეზიდენტმა ვლადიმერ პუტინმა დღეს განაცხადა, რომ საქართველოს წინააღმდეგ სანქციების შემოღება არ სურს. ამ გადაწყვეტილებას ოფიციალური თბილისი მიესალმა. 

8 ივლისს რუსეთის დუმის საგარეო საკითხთა კომიტეტმა მხარი დაუჭირა მმართველი პარტიის „ედინაია რასიას“ ფრაქციის წინადადებას, რომელიც საქართველოდან ღვინისა და მინერალური წყლის იმპორტის შეზღუდვას და ორ ქვეყანას შორის ფულადი გზავნილების აკრძალვას ითვალისწინებს. 

რუსი დეპუტატების ეს ინიციატივა, სავარაუდოდ, „რუსთავი 2“-თან  დაკავშირებულ მოვლენებს მოჰყვა, რასაც რუსეთის პრეზიდენტის პრესსპიკერი და საგარეო უწყება გამოეხმაურნენ.

ამ მოვლენებს წინ უძღოდა 20 ივნისის ინციდენტი, როდესაც საქართველოს პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

8 ივლისიდან რუსეთის პრეზიდენტის ვლადიმერ პუტინის ბრძანებით, რუსეთ-საქართველოს შორის პირდაპირი ფრენები შეწყდა.