ვლადიმერ პუტინი გიორგი გაბუნიაზე: ვიღაც გამოვიდა და რაღაც დააბრეხვა

რუსეთის პრეზიდენტის, ვლადიმერ პუტინის თქმით, „დიდი პატივია“ „რუსთავი 2“-ის ჟურნალისტისთვის, გიორგი გაბუნიასთვის მის წინააღმდეგ სისხლის სამართლის აღძვრა. ასე გამოეხმაურა პუტინი გიორგი გაბუნიას მიერ პირდაპირ ეთერში გაკეთებულ მონოლოგს. ამის შესახებ ინფორმაციას რუსული მედია ავრცელებს.

„ვიღაც გამოვიდა, რაღაც დააბრეხვა, თითქოს ვინმე ყოფილიყო. მის შესახებ ადრე არავინ არაფერი იცოდა, ახლა კი ყველა მასზე ლაპარაკობს, მან თავისას მიაღწია. ახლა უფლებამოსილება შეუჩერეს და ორი თვით დასასვენებლად წავიდა. შემდეგ ისევ მივა და შესთავაზებენ სამსახურს“, - თქვა პუტინმა და დასძინა, რომ ამის მიუხედავად საქართველოში არსებობენ ადამიანები, რომლებიც ამას აპროტესტებენ. 

დღესვე ვლადიმერ პუტინმა განაცხადა, რომ საქართველოს წინააღმდეგ სანქციების შემოღება არ სურს. ეს პუტინმა ქართველი ხალხის მიმართ პატივისცემით და რუსულ-ქართული ურთიერთობების შენარჩუნების მიზეზით ახსნა. პუტინის განცხადებას გამოეხმაურა საქართველოს საგარეო საქმეთა მინისტრი დავით ზალკალიანი.

8 ივლისს რუსეთის დუმის საგარეო საკითხთა კომიტეტმა მხარი დაუჭირა მმართველი პარტიის „ედინაია რასიას“ ფრაქციის წინადადებას, რომელიც საქართველოდან ღვინისა და მინერალური წყლის იმპორტის შეზღუდვას და ორ ქვეყანას შორის ფულადი გზავნილების აკრძალვას ითვალისწინებს.

რუსი დეპუტატების ეს ინიციატივა, სავარაუდოდ, „რუსთავი 2“-თან  დაკავშირებულ მოვლენებს მოჰყვა, რასაც რუსეთის პრეზიდენტის პრესსპიკერი და საგარეო უწყება გამოეხმაურნენ.

ამ მოვლენებს წინ უძღოდა 20 ივნისის ინციდენტი, როდესაც საქართველოს პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

8 ივლისიდან რუსეთის პრეზიდენტის ვლადიმერ პუტინის ბრძანებით, რუსეთ-საქართველოს შორის პირდაპირი ფრენები შეწყდა.