ზოიძე: ურიგო არ იქნება თუ უზენაესის მოსამართლეების საკითხს შემდეგი მოწვევის პარლამენტი გადაწყვეტს

პარლამენტის ჯანდაცვის კომიტეტის თავმჯდომარის, უმრავლესობის წევრის აკაკი ზოიძის განცხადებით, მიკროსკოპის ქვეშ უნდა გატარდეს უზენაესი სასამართლოს მოსამართლეობის თითოეული კანდიდატი, რომელსაც პარლამენტი მხარს დაუჭერს ან არ დაუჭერს. ამის შესახებ მან ჟურნალისტებს უთხრა, რომელიც ამ თემასთან დაკავშირებით პარლამენტში შეხვედრას ესწრება. 

აკაკი ზოიძის განცხადებით, არ იქნება ურიგო თუ პროპორციული სისტემით არჩეულ პარლამენტს დაუტოვებს მეცხრე მოწვევის პარლამენტი ამ საკითხს გადასაწყვეტად:

"თუ იქნება ორი ღირსეული კანდიდატი, ორი მოსამართლე უნდა დაინიშნოს და დანარჩენზე უარი ითქვას. მერე ეს პროცესი ან თავიდან უნდა დაიწყოს ან შემდეგი მოწვევის პარლამენტმა გააგრძელოს. პროპორციული არჩევნების ერთ-ერთი ამოცანა გახლავთ, რომ კიდევ უფრო მაღალი პოლიტიკური ნდობის პარლამენტი მივიღოთ, სადაც თითოეულ მოქალაქეს ექნება შეგრძნება, რომ მისი ინტერესების გამომხატველი ადამიანი მოხვდა პარლამენტში. არ იქნება ურიგო თუ ასეთ პარლამენტს დავუტოვებთ გადასაწყვეტად ამ საკითხს. ეს ჩემი პირადი აზრია. არ მგონია, რომ 20 იდეალური კანდიდატი მოვძებნოთ", - განაცხადა აკაკი ზოიძემ.

ასევე ფიქრობს "შენების მოძრაობის" ლიდერი დავით უსუფაშვილი, რომელიც აცხადებს, რომ უზენაეს სასამართლოში ვაკანსიების უმრავლესობის საკითხი მომავალი პარლამენტის გადასაწყვეტი უნდა იყოს, მეცხრე მოწვევის პარლამენტმა კი უზენაეს სასამართლოში მხოლოდ რამდენიმე მოსამართლე უნდა გაამწესოს. 

უზენაესი სასამართლოს მოსამართლეების შერჩევის პროცესთან დაკავშირებით ნაზი ჯანეზაშვილი და ანა დოლიძე დეპუტატებს ხვდებიან. იუსტიციის უმაღლესი საბჭოს არამოსამართლე წევრები პარლამენტში ლევან გოგიჩაიშვილმა, ლევან კობერიძემ, კობა ნარჩემაშვილმა და ბიძინა გეგიძემ მიიწვიეს. მიზეზი შერჩევის პროცედურებთან დაკავშირებით გაკეთებული განცხადებები გახდა, ანა დოლიძე  და ნაზი ჯანეზაშვილი პროცესის შეწყვეტას ითხოვენ. მათი თქმით, იუსტიციის უმაღლესი საბჭო ცდილობს სამივე ინსტანციის სასამართლოში მათთვის სასურველი მოსამართლეები გაამწესოს. საბჭოს არამოსამართლე წევრების პოზიციას იზიარებენ უმრავლესობიდან წასული დეპუტატებიც.  

ისინი აცხადებენ, რომ უზენაესს სასამართლოში ამ ეტაპზე მხოლოდ 6-მდე მოსამართლე უნდა გამწესდეს, დანარჩენი კი მომავალი მოწვევის პარლამენტმა უნდა აირჩიოს.

უზენაესი სასამართლოს მოსამართლის ვაკანსიაზე განცხადებების მიღება 1 ივნისს დასრულდა. განცხადებების მიღება ელექტრონულად 11 მაისიდან 31 მაისის ჩათვლით მიმდინარეობდა.

როგორ აირჩევენ საქართველოს უზენაესი სასამართლოს მოსამართლეებს შეგიძლით იხილოთ ბმულზე.