ხაზარაძე: ყველაფრისთვის მზად ვარ, ვერავინ ვერავის შეაშინებს

„არავის ეგონოს, რომ რამე გამაჩერებს, იმიტომ, რომ მართალი ვარ“, - ასე უპასუხა ჟურნალისტების შეკითხვებს „თიბისი ბანკის“ დამფუძნებელმა მამუკა ხაზარაძემ, რომელიც პროკურატურაში მივიდა. 

ის არ გამორიცხავს, რომ პროკურატურაში მისი დაბარება ბიზნესმენის პოლიტიკურ  მიზნებს უკავშირდებოდეს. 

„მინდა ყველას ვუთხრა, დაწყნარდით, ნუ ნერვიულობთ, ჩვენ გავაგრძელებთ მოძრაობას, ეს საქართველო არის ჩვენი. ეს ქვეყანა უნდა გახდეს ძლიერი, ევროპული ორიენტაციის... მზად ვარ ყველაფრისთვის, ვერავინ ვერავის შეაშინებს“, - განაცხადა მამუკა ხაზარაძემ.

მან ანაკლიის პროექტზეც გაამახვილა ყურადღება. „თქვენ იცით, რომ ანალოგიური შემოტევა იყო იანვარში, რამაც მოგვაყენა სერიოზული ზიანი როგორც ბანკის საერთაშორისო აქციონრებს, ასევე ანაკლიის პროექტის მოლაპარაკებას. 6 თვე დასჭირდა ამ პროცესის დასტაბილურებას, ინვესტორების უკან შემოტრიალებას.

დღეს ისევ ვიღებთ ასეთ განცხადებას, ისევ ტელევიზიით, რომ ზიანი მიადგეს არა მამუკა ხაზარაძეს, არამედ საქართველოს ფინანსურ ინტერესებს, ანაკლიის პროექტს. თუ ვინმეს ჰგონია, რომ ეს მამუკა ხაზარაძის პროექტია, ძალიან ცდება, ეს არის ჩვენი შვილების და შვილიშვილების პროექტი - საქართველოს აბსოლუტურად ახალი გზა, ეს არის გარღვევა ეკონომიკური თვალსაზრისით, ასევე ევროპისკენ გადადგმული მძლავრი ნაბიჯი, ამის წინააღმდეგ მიდის ეს ყველაფერი. ამიტომ, მე აქ მოვედი, მოვალ რამდენჯერაც დამიბარებენ. მე ვარ კანონმორჩილი ადამიანი“, - განაცხადა მამუკა ხაზარაძემ. 

პროკურატურამ მამუკა ხაზარაძე და ბადრი ჯაფარიძე ბრალის წარსადგენად დღეს დაიბარა. 

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.

9 ივლისს კი გაირკვა, რომ მამუკა ხაზარაძე საზოგადოებრივ მოძრაობას აფუძნებს.