ჯაფარიძე: სასამართლოში დაკითხვისას სებ-ის თანამშრომელს პროკურატურა აბულინგებდა

თბილისის საქალაქო სასამართლოში დღეს ბრალდების მხარის მოწმის დაკითხვასთან დაკავშირებით, თიბისი ბანკის დამფუძნებელმა, ბადრი ჯაფარიძემ განაცხადა, რომ პროკურატურის მხრიდან მოწმის ბულინგს ჰქონდა ადგილი. 

ბადრი ჯაფარიძემ სხდომის შემდეგ თქვა, რომ მოწმე პროკურორს ეკითხებოდა, გაეცა თუ არა პასუხი. 

საუბარია ეროვნული ბანკის საბანკო ზედამხედველობის დეპარტამენტის უფროს აკაკი გელაზონიაზე, რომელმაც 2008 წელს განხორციელებული სადავო ტრანზაქცია შეამოწმა.

მასთან დაკავშირებით მამუკა ხაზარაძემაც ისაუბრა და მახინჯ სისტემაზე გაამახვილა ყურადღება, რომელშიც მისი თქმით, ეროვნული ბანკიც არის ჩართული. 

„დააჩქარეს განხვილვები, რომ კვირაში 5 დღე სასამართლოში ვიყოთ, თუმცა ვერაფერი გაგვაჩერებს“, - განუცხადა მამუკა ხაზარაძემ ჟურნალისტებს. 

„თიბისი ბანკის“ საქმეზე სასამართლოში სებ-ის თანამშრომელი დაიკითხა. 

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონამდე დოლარის ტრანზაქციაზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

მამუკა ხაზარაძესა და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით)“.  მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით, თითოეულს 700 000 ლარიანი გირაო შეუფარდა. ამავე საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას. საქალაქო სასამართლომ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა, რაც მისმა ადვოკატმა გაასაჩივრა.

სხდომის დაწყებამდე ბრალდებულებმა პოლიტიკური განცხადებები გააკეთეს. მამუკა ხაზარაძის განცხადებით, საქმეს სამართლებრივი საფუძველი არ აქვს და ის პოლიტიკურ დევნას წარმოადგენს. ავთანდილ წერეთელი ამ საქმეს კვლავ ტელეკომპანია „პირველს“ უკავშირებს, მამუკა ხაზარაძე და ბადრი ჯაფარიძე კი - იმ პოლიტიკურ მოძრაობას, რომელიც მათ დააფუძნეს.