პროკურორი: მოწმემ დაადასტურა, რომ ხაზარაძემ და ჯაფარიძემ სესხები რეგულაციების დარღვევით მიიღეს

„დღევანდელ პროცესზე დაიკითხა მნიშვნელოვანი მოწმე, ეროვნული ბანკის წარმომადგენელი, რომელმაც ჩაატარა შემოწმება თიბისი ბანკში და მისი  ჩვენებით დადასტურდა კიდევ ერთხელ, რომ სესხების გაცემის შემდგომ, „სამგორი ჯგუფიდან“ იგივე სესხები მამუკა ხაზარაძემ და ბადრი ჯაფარიძემ რეგულაციების დარღვევით მიიღეს“-ამის შესახებ პროკურორმა არჩილ ტყეშელაშვილმა განაცხადა.

მისივე თქმით, დღეს ასევე, ერთმნიშვნელოვნად დადასტურდა კიდევ ერთი დარღვევა, რომ ბანკმა უზრუნველყოფის ქონებების მიქცევა სესხების ამოსაღებად არ განახორციელა და ამ ქმედებებით თიბისი ბანკმა მიიღო დაახლოებით 16 მილიონი დოლარის ოდენობის ზიანი.

არჩილ ტყეშელაშვილმა ასევე განმარტა, რომ ფინანსისტი და ეროვნული ბანკის წარმომადგენელი ამ ფაქტს სამართლებრივ შეფასებას ვერ მისცემდა.

„მოწმე, რომელიც  იყო ეროვნული ბანკის წარმომადგენელი, ჩაატარა ინტერესთა კონფლიქტთან შეუთავსებლობის შემოწმება. უკანონო შემოსავლის კვალიფიკაციას ფაქტს აძლევს ბრალდების მხარე. ჩვენ ამ ქმედებებს მივეცით სისხლის სამართლებრივი შეფასება, რომ ეს იყო უკანონო შემოსავლის ლეგალიზაცია და საბოლოო გადაწყვეტილება, ეს ასე იყო თუ არ იყო უნდა მიიღოს სასამართლომ. შესაბამისად, ფინანსისტი და ეროვნული ბანკის წარმომადგენელი ამ საკითხზე თავის დასკვნას ვერ გააკეთებდა“,-აღნიშნა პროკურორმა.

მისივე თქმით, მოწმეთა ბაზაში არიან როგორც თიბისი ბანკის, ასევე „სამგორი ჯგუფის“ წარმომადგენლები, გამომძიებლები და ფინანსისტები.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონამდე დოლარის ტრანზაქციაზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

მამუკა ხაზარაძესა და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით)“.  მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით, თითოეულს 700 000 ლარიანი გირაო შეუფარდა. ამავე საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას. საქალაქო სასამართლომ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა, რაც მისმა ადვოკატმა გაასაჩივრა.

სხდომის დაწყებამდე ბრალდებულებმა პოლიტიკური განცხადებები გააკეთეს. მამუკა ხაზარაძის განცხადებით, საქმეს სამართლებრივი საფუძველი არ აქვს და ის პოლიტიკურ დევნას წარმოადგენს. ავთანდილ წერეთელი ამ საქმეს კვლავ ტელეკომპანია „პირველს“ უკავშირებს, მამუკა ხაზარაძე და ბადრი ჯაფარიძე კი - იმ პოლიტიკურ მოძრაობას, რომელიც მათ დააფუძნეს.