ხალვაში: ოქრუაშვილზე საუბარი არ მინდა, რასაც ვიტყვი ძალიან მძიმე იქნება მისთვის

ბიზნესმენი ქიბარ ხალვაში თავდაცვის ყოფილი მინისტრის ირაკლი ოქრუაშვილის განცხადებებს პასუხობს. 

ექსპერტიზის ბიუროს დატოვების შემდეგ, სადაც ხელმოწერის ნიმუში დატოვა, ხალვაშმა თქვა, რომ ოქრუაშვილმა კეთილდღეობისთვის შეიძლება, ყველაფერი იკისროს.

„მითხრეს, რომ გააკეთებენ ხელმოწერის ანალიზს და მხოლოდ მაშინ ჩამბარდება, როცა ფულს გადავიხდი. ახლა ოქრუაშვილისგან ველოდები რამე ძღვენს, რომ მივიდე, ადრე გადავიხადო და მიიღოს პასუხი. შემიძლია, გვიან გადავიხადო.

ოქრუაშვილზე საუბარი არ მინდა, მისი ბავშვის ნათლია ვარ, რასაც ვიტყვი ძალიან მძიმე იქნება მისთვის, იმ ბავშვს გულს დავწყვეტ, ღმერთის მეშინია.

უბრალოდ, ოქრუაშვილი არის ბოლო კაცი, ნაძირალა, არის გაუმაძღარი ადამიანი, რომელმაც კეთილდღეობისთვის შეიძლება, ყველაფერი იკისროს. ეს არის ჩემი ბოლო კომენტარი,“ - განაცხადა ქიბარ ხალვაშმა.

ირაკლი ოქრუაშვილმა განაცხადა, რომ „რუსთავი 2“-ის მესაკუთრეა და „რუსთავი 2“-ის 100%-იანი წილი ქიბარ ხალვაშის სახელით შეისყიდა, თუმცა კომპანიის დღევანდელი მფლობელი ამ დოკუმენტს არ აღიარებს და ამბობს, რომ ხელმოწერა გაყალბებულია.

დოკუმენტზე არსებული ხელმოწერის ნამდვილობასთან დაკავშირებით განცხადება 24 ივლისს ირაკლი ოქრუაშვილის ყოფილმა თანაგუნდელმა მიხეილ ქარელმა გააკეთა. მისი განცხადებით, ირაკლი ოქრუაშვილმა ქიბარ ხალვაშის ხელმოწერა გააყალბა და მზად არის, ამასთან დაკავშირებით ჩვენებაც მისცეს.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.