ირაკლი ოქრუაშვილმა მიხეილ ქარელს ნაფტალინიანი ადამიანი უწოდა

ირაკლი ოქრუაშვილის განცხადებით, მისი ყოფილი თანაგუნდელის, მიხეილ ქარელის განცხადებასთან დაკავშირებით კომენტარი რომ გააკეთოს "ოქრუაშვილი კი აღარ ვიქნები, გამოშტერებულიშვილი ვიქნები". ასე აფასებს ის ქარელის განცხადებას, რომლის მიხედვითაც ოქრუაშვილმა "რუსთავი 2"-თან დაკავშირებით ქიბარ ხალვაშის ხელმოწერა გააყალბა. მის კომენტარს სააგენტო "ინტერპრესნიუსი" ავრცელებს.

„მიხეილ ქარელისნაირი ადამიანის განცხადებაზე, ესე იგი ნაფტალინიან ადამიანებზე, კომენტარი რომ გავაკეთო, ოქრუაშვილი კი აღარ ვიქნები, გამოშტერებულიშვილი ვიქნები. აი, ეს არის კომენტარი", - განაცხადა ირაკლი ოქრუაშვილმა.

მიხეილ ქარელმა "ქრონიკასთან" ინტერვიუში პარიზში მომხდარი ამბავი გაიხსენა და თქვა, რომ ხალვაშსა და ოქრუაშვილს შორის 2010 წელს გაფორმებულ დოკუმენტზე, რომლის მიხედვითაც ირაკლი ოქრუაშვილი თითქოს „რუსთავი 2“-ის ფორმალური მმართველია, ხალვაშის ხელმოწერა გაყალბებულია.

„მთელი პასუხისმგებლობით ვაცხადებ, რომ ეს არის გაყალბებული ხელმოწერები. მე პირადად ვარ შესწრებული, როდესაც მან [ირაკლი ოქრუაშვილმა] პარიზში მოიტანა ნიმუში ამ ხელმოწერის და იქ მყოფ ადამიანებს სთხოვა გაეყალბებინათ მსგავს ხელმოწერაზე... გარკვეული ხნის განმავლობაში ის ავარჯიშებდა ამ ადამიანებს. მე მზად ვარ როგორც გამოძიებას, ასევე სასამართლოს წინაშე ვთქვა ამ ადამიანების სახელები და გვარები", - განაცხადა ქარელმა.

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა.

მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.

ირაკლი ოქრუაშვილის ყოფილი თანამებრძოლი მიხეილ ქარელი 2002-2003 წლებში „ნაციონალური მოძრაობის“ გორის ორგანიზაციის აღმასრულებელი მდივანი, ხოლო 2004-2007 წლებში შიდა ქართლში საქართველოს პრეზიდენტის სახელმწიფო რწმუნებული იყო.