ციხელაშვილი: მავთულხლართის გავლების მიზანი საზოგადოებაზე წნეხია

მავთულხლართის გავლებას ამა თუ იმ სოფელში არანაირი სამხედრო დანიშნულება არ აქვს, მისი დანიშნულება არის პოლიტიკური, რომ მუდმივი წნეხი იყოს საზოგადოებაზე, განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა „ქრონიკის“ ეთერში, როდესაც გუგუტიანთკარის მოვლენები შეაფასა.

მინისტრის განცხადებით, მიზანია, „დაიძაბოს საზოგადოებრივი დისკურსი, იყოს არასტაბილურობის განცდა, ერთგვარი შიში“.

„ეს ყველაფერი თავის მხრივ მიმართულია იმისკენ, რომ საოკუპაციო ძალამ გავლენების გაზრდა სცადოს; ერთგვარად ჩვენი კურსიდან ამოგვაგდოს. სწორედ ამაზეა ჩვენი პასუხი ის, რომ კურსს არავითარ შემთხვევაში გადავუხვიოთ. პირველი რაც უმნიშვნელოვანესია, ეს არის მშვიდობის დაცვა. ჩვენი ქვეყნის განვითარებისთვის და კონფლიქტის მშვიდობიანი მოგვარებისთვის ეს საციცოცხლო ამოცანაა, რომ ჩვენი არჩეული კურსიდან არ გადავუხვევთ-ეს არის პასუხი-ევროპულ და ევროატლანტიკურ კურსს ვგულისხმობ“, - განაცხადა ქეთევან ციხელაშვილმა.

ოკუპანტებმა გუგუტიანთკართან მავთულხლართების მონტაჟი 14 აგვისტოს განაახლეს.

6 ქვეყნის ელჩები და დიპლომატიური კორპუსის 20-მდე წარმომადგენელი არსებულ სიტუაციას ადგილზე გუშინ გაეცნენ. მანამდე კი საგარეო უწყებამ რუსეთს მოუწოდა, შეწყვიტოს საქართველოს წინააღმდეგ უკანონო ქმედებები. 

საგარეო საქმეთა მინისტრი დავით ზალკალიანი დღეს გუგუტიანთკარში ჩავიდა. მინისტრმა ადგილზე ვითარების გაცნობის შემდეგ არსებულ მდგომარეობას დამთრგუნველი უწოდა და განაცხადა, რომ ოკუპაცია გრძელდება.

ზალკალიანმა გუგუტიანთკარის მოვლენები ფაქტობრივ ანექსიად შეაფასა. მინისტრის თქმით, მუდმივი კონტაქტი იყო საერთაშორისო პარტნიორებთან, რასაც მოჰყვა სახელმწიფო დეპარტამენტის მკაცრი განცხადება. ამასთან, საქართველოს აქვს ძალიან მყარი მხარდაჭერა, რაც გამოიხატა ევროპელების განცხადებაშიც. სწორედ ამიტომ, ზალკალიანის განცხადებით, ორი დღეა, ეს პროცესი შეჩერდა. მინისტრის თქმით, უწყებამ ყველა საერთაშორისო მექანიზმი გამოიყენა.

რაც შეეხება დღეს გავრცელებულ ინფორმაციას, რომლის მიხედვითაც ოკუპანტებმა სოფელ ახალუბნიდან 7 მოქალაქე გაიტაცეს, მინისტრები აცხადებენ, რომ ინფორმაცია მოწმდება.