ირაკლი იმნაიშვილმა თავისი ამბიცია დაასახელა

„რუსთავი 2“-ის გენერალურმა დირექტორმა, პაატა სალიამ ირაკლი იმნაიშვილი ტელეკომპანიის საინფორმაციო სამსახურის ხელმძღვანელად ოფიციალურად წარადგინა.

სალიას თქმით, „რუსთავი 2“-ის კარი ღიაა ყველასთვის, ვინც ემოციურ ფონზე მიიღო ნაჩქარევი გადაწყვეტილება. „ტელეკომპანიის კარი ღიაა პროფესიონალებისთვის, ვინც წლებია, მუშაობდა და ვისაც უნდა, ეს არხი იყოს მაღალპროფესიული, დამოუკიდებელი, მიუკერძოებელი, კრიტიკული ტელევიზია. დღეს საზოგადოებას ვუბრუნდებით პოზიტიური სიახლით, რომელიც ძალიან კარგად მიიღო პირველ რიგში, „რუსთავი 2“-ის გუნდმა, იმ ადამიანებმა, რომლებიც ამ არხის ბოლომდე ერთგულნი არიან. მათი რიცხვი ძალიან დიდია. ამ ადამიანების რიცხვი არის დაახლოებით 800 თანამშრომელი"- განაცხადა სალიამ.

ირაკლი იმნაიშვილის თქმით, მთავარი ამოცანაა შეიქმნას სარედაქციო ჩარჩო-ხელშეკრულება, სადაც გაწერილი იქნება, რომელსაც ექნება იურიდიული ძალა. „ეს იქნება კონტრაქტი მფლობელებსა და საინფორმაციო სამსახურს შორის და ეს ჟურნალისტებს მისცემს საშუალებას დაიცვან საკუთარი თავი. რუსთავი 2 იყო გამარჯვებული ხალხის ტელევიზია, თუმცა ხალხსაც და მფლობელებსაც ეს ტელევიზია მალევე წაართვეს და თუ ჩვენი მოლაპარაკება დამთავრდება წარმატებით, მაქვს ამბიცია, „რუსთავი 2“ გახდეს გამარჯვებული ჟურნალისტებისა და თანამშრომლების ტელევიზია"- განაცხადა იმნაიშვილმა.

ჟურნალისტი ირაკლი იმნაიშვილი 2000-ანი წლების დასაწყისში ტელეკომპანია „მზე“-ზე მუშაობდა. მაშინდელ სახელისუფლებო გუნდთან დაპირისპირების გამო, 2005 წელს მისი გადაცემა „არჩევანის ზღვარზე“ არხის ხელმძღვანელობამ დახურა, რის შემდეგაც ჟურნალისტი დიდ ბრიტანეთში გადავიდა საცხოვრებლად. ბოლო წლებში ის საქართველოში ცალკეულ მედია პროექტებზე მუშაობდა.

რამდენიმე დღის წინ ცნობილი გახდა, რომ ტელეკომპანია „რუსთავი 2“-ის საინფორმაციო სამსახურის ხელმძღვანელად მუშაობას ნინო შუბლაძე დათანხმდა, თუმცა ინფორმაციის გასაჯაროების შემდეგ, რასაც მისი ყოფილი კოლეგების მხრიდან ნეგატიური გამოხმაურება მოჰყვა, შუბლაძემ არხზე დაბრუნება გადაიფიქრა.