გახარია: „ნაცმოძრაობასა“ და „ევროპულ საქართველოს“ შორის სხვაობა არ არსებობს

პრემიერმინისტრობის კანდიდატის გიორგი გახარიას განცხადებით, „ნაციონალურ მოძრაობასა“ და „ევროპულ საქართველოს“ შორის სხვაობა არ არსებობს. ამის შესახებ მან ჟურნალისტებს მას შემდეგ განუცხადა, რაც „ევროპული საქართველოს“ წევრებმა გახარიას პასუხების მოსმენაზე უარი თქვეს და ფრაქციის სხდომა ნაადრევად დაასრულეს.

„ფაქტია, რომ მათ შორის სხვაობა უბრალოდ არ არსებობს. „ნაციონალური მოძრაობა“ გაიქცა პარლამენტიდან, მათმა ფილიალმა „ევროპულმა საქართველომ“ კი ჩაიგდო ხელში მიკროფონი. მათ საერთოდ არ აინტერესებდა პასუხები. მათი მიზანი იყო მხოლოდ ტყუილების თქმა. გასაოცარი იყო, რომ პასუხის გაცემის საშუალებას არ მაძლევდნენ - ძალიან გასაკვირი ფორმატია. მიუხედავად იმისა, რომ რამდენჯერმე ჩვენ შევთავაზეთ 20 ივნისის მოვლენებზე გვესაუბრა, მათ ეს არ აინტერესებდათ.

ეს არის ერთი ჯგუფი, რომელიც სიცრუეზე დაფუძნებით ცდილობს, ჩვენს საზოგადოებაში მოდელირებული რეალობით შექმნას გარკვეული დაძაბულობა და რევოლუციური მოლოდინები, რის საშუალებასაც ჩვენ მათ არ მივცემთ. პრობლემა არის ის, რომ შეუძლებელია ქვეყნის განვითარება, როდესაც ოპოზიცია ასეთ სასოწარკვეთილ მდგომარეობაში იმყოფება და არ შესწევს უნარი, შინაარსობრივ დისკუსიაში შემოვიდეს. 

მაშინ, როდესაც ეს ხალხი მედიის თავისუფლებაზე გველაპარაკება, დღეს უბრალოდ პასუხის გაცემის საშუალებას არ გვაძლევდნენ. რაც შეეხება მაკო გომურს, მე როგორმე პირად გავცემ მას ყველა შეკითხვაზე პასუხს“, - განაცხადა გახარიამ.

ჟურნალისტების კითხვაზე, როგორი იქნება გახარიას პასუხი, თუ მამუკა ხაზარაძისადმი გაგზავნილ წერილზე მისი ხელმოწერის არსებობა დადასტურდება, პრემიერობის კანდიდატმა განაცხადა, რომ წერილის ექსპერტიზაზე გაგზავნიდან ექვსი თვე გავიდა, და ხაზარაძის ადვოკატს ურჩია, ექსპერტიზის პასუხი პლენარულ სხდომაზე კენჭისყრას დაამთხვიოს.

მანამდე გახარიას „ნაციონალური მოძრაობის“ ფრაქციის სხდომაზე უსმენდნენ, სადაც მაკო გომურისა და მოძრაობა „სირცხვილიას“ წევრების დაშვებას ითხოვდნენ. ამის შემდეგ მაკო გომურმა Facebook-ზე დაწერა, რომ კახეთში იმყოფებოდა და მისთვის საშვის დაშვების შესახებ მხოლოდ სხდომის დაწყებამდე 5 წუთით ადრე გაიგო. მოგვიანებით მან საკუთარი პოსტი წაშალა.

მალევე აქციის ორგანიზატორებმა განაცხადეს, რომ მაკო გომურს ჰქონდა ინფორმაცია, რომ მასზე საშვი იყო დაშვებული. აქციის სხვა მონაწილეების თქმითაც, იმ ადამიანებს შორის იყო მაკო გომურიც, ვისზეც საშვი იყო დაშვებული. მოგვიანებით ხოშტარიამ პრემიერობის კანდიდატს მაკო გომურის შეკითხვა წაუკითხა. მაკო გომურმა 20 ივნისის აქციის დაშლის დროს თვალი დაკარგა. 

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი.