უგულავა: სალომე ზურაბიშვილი სასახლიდან არის გასაძევებელი

საქართველოს პრეზიდენტის სალომე ზურაბიშვილის გადაწყვეტილებას პატიმრების შეწყალებაზე მორატორიუმის გამოცხადებასთან დაკავშირებით ოპოზიცია "მორიგ უპასუხისმგებლო გადაწყვეტილებას" უწოდებს.

როგორც "ევროპული საქართველოს" წევრმა ელენე ხოშტარიამ განაცხადა, "მორატორიუმი არის კიდევ ერთი უპასუხისმგებლობა, რომელიც ზურაბიშვილმა დაამატა სასტიკ შეწყალებებს... დღეს იყო მოლოდინი, დაესაბუთებინა, რას ეყრდნობა კიდევ ერთი მკვლელის შეწყალება, მაგრამ არა, ნაცვლად ამისა, საერთოდ შეაჩერა პროცესი".

"ევროპული საქართველოს" კიდევ ერთი ლიდერის გიგი უგულავას განცხადებით, "სალომე ზურაბიშვილი სასახლიდან არის გასაძევებელი". ამის შესახებ უგულავამ სოციალურ ქსელში დაწერა.

"სალომე ზურაბიშვილმა განაცხადა, რომ შეწყალება "მისი სუბიექტური" გადაწყვეტილებაა. ალბათ, უნდოდა ეთქვა, რომ პრეზიდენტის აბსოლუტური დისკრეციაა. ამასთანავე, თქვა, რომ უუნაროა და შემიზღუდეთ ეს აბსოლუტური უფლებაო. პირიქითაა, შეწყალება უნდა იყოს აბსოლუტური დისკრეცია, უბრალოდ ეს დღეს აბსოლუტური იდიოტის ხელშია. კანონი კი არაა შესაცვლელი, სალომე ზურაბიშვილია სასახლიდან გასაძევებელი. შეუძლებელია! ათონელზე ზის "მაიმუნი გახსნილი „ლიმონკით“, - წერს უგულავა.

"ნაციონალური მოძრაობის" წევრი, დეპუტატი რომან გოცირიძე კი ამბობს, რომ პრეზიდენტი უნდა გადადგეს. მისი თქმით, "შეწყალებასთან დაკავშირებით კანონმდებლობა და წესები კი არა, არამედ პრეზიდენტია შესაცვლელი". გოცირიძის შეფასებით, მორატორიუმის გამოცხადება არაფერს შეცვლის. 

"მას შეწყალების კონსტიტუციური უფლება აქვს, ოღონდ სამართლიანად, კანონისა და შესაბამისი პროცედურების დაცვით. ამიტომ მორატორიუმის გამოცხადება არის საკუთარი შეცდომების გამოსწორების არასერიოზული მცდელობა. მორატორიუმი კი არა, პრეზიდენტი უნდა გადადგეს", - განაცხადა რომან გოცირიძემ.

რაც შეეხება მმართველ გუნდს, საპარლამენტო უმრავლესობის ლიდერის, გია ვოსლკის შეფასებით, პრეზიდენტმა სწორი გადაწყვეტილება მიიღო. ვოლსკის თქმით, შეკითხვებზე პასუხებია საზოგადოებაში გასაცემი. "პროკურატურა სერიოზულად უნდა დაფიქრდეს, არის თუ არა ამაში დანაშაულების ნიშნები და რამდენად შეესაბამება იმ სამართლებრივ ნორმებს, რომლებიც კონსტიტუციით არის გაწერილი", - თქვა გია ვოლსკიმ.

მამუკა მდინარაძის შეფასებით კი მისთვისაც "სიურპრიზი იყო მსჯავრდებულთა შეწყალებების თაობაზე ასეთი გადაწყვეტილებები". მდინარაძის განცხადებით, "მორატორიუმი შესაძლოა, პრობლემასაც წარმოადგენდეს, რადგან ეს არ არის მხოლოდ პრეზიდენტის უფლება, ასევე არის მსჯავრდებულის უფლება, რომ იყოს შეწყალებული".

საქართველოს პრეზიდენტმა სალომე ზურაბიშვილმა დღეს პატიმრების შეწყალებაზე მორატორიუმი გამოაცხადა. 

ბოლო დღეების განმავლობაში პრეზიდენტ ზურაბიშვილს 28 აგვისტოს, მარიამობის დღესასწაულთან დაკავშირებით მსჯავრდებულების შეწყალებასთან, კონკრეტულად კი რამდენიმე მსჯავრდებულის შეწყალებასთან დაკავშირებით აკრიტიკებენ.

საუბარია 2014 წელს პოლიციელ თარაშ მუკბანიანის მკვლელობისთვის, 2004 წელს დავით ოთხმეზურის მკვლელობისა და 1994 წელს გიორგი ქოიავას მკვლელობისთვის მსჯავრდებულების შეწყალებაზე. მმართველი გუნდი და ოპოზიცია პრეზიდენტის ადმინისტრაციისგან ამ საკითხის ირგვლივ დამატებით განმარტებებს მოითხოვენ.

მარიამობის დღესასწაულთან დაკავშირებით პრეზიდენტმა სულ 34 მსჯავრდებული, მათ შორის 1 არასრულწლოვანი და 8 ქალი შეიწყალა. მოგვიანებით ცნობილი გახდა, რომ შეწყალებულთა შორის ერთ-ერთი პოლიციელის მკვლელობაში მსჯავრდებულიც იყო, რასაც საზოგადოების ნაწილის უკმაყოფილება მოჰყვა. 29 აგვისტოს პრეზიდენტმა განაცხადა, რომ ამ ფაქტის განმარტებას არ აპირებს, რადგან შეწყალება მისი დისკრეციული უფლებაა.

სალომე ზურაბიშვილის გაპრეზიდენტების შემდეგ, პრეზიდენტის ადმინისტრაციასთან მოქმედი შეწყალების კომისია რამდენიმე წევრმა დატოვა. მაშინ ადმინისტრაციაში განაცხადეს, რომ კომისიის დაკომპლექტებაზე მუშაობა დაიწყეს, თუმცა ჯერჯერობით კომისია არ მოქმედებს. კრიტიკის ფონზე 6 სექტემბერს სალომე ზუაბიშვილი გამოვიდა ინიციატივით, რომ შეწყალების გამოყენების უფლება დროულად დაიხვეწოს.

2019 წლის მარტში ცნობილი გახდა, რომ შეწყალების კომისია იუსტიციის სამინისტროში გადავა.