ეკა ბესელია: მოსამართლეობის კანდიდატების მოსმენა უპასუხისმგებლო დამოკიდებულებით იწყება

იურიდიულ საკითხთა კომიტეტში უზენაესი სასამართლოს მოსამართლეობის კანდიდატებთან გასაუბრება დაიწყო.

მანამდე კი კომიტეტის სხდომაზე პოლიტიკური განცხადებები გაკეთდა. როგორც სხდომის დაწყებისას კომიტეტის თავმჯდომარემ ანრი ოხანაშვილმა განაცხადა, მოსამართლეობის კანდიდატების მოსმენის პროცედურა შეთანხმებულია როგორც ოპოზიციასთან, ასევე მმართველ გუნდთან. 

"თითო ფრაქციას 29 წუთი აქვს ინტერვიუს ჩასატარებლად, რაც ეხებათ უფრაქციო პარლამენტის წევრებს, მათ ჯამში ექნებათ ორმოცი წუთი იმისთვის, რომ დაასრულონ ინტერვიუ თითოეულ მათგანთან. ამის შემდგომ საათი და 15 წუთი სახალხო დამცველს არასამთავრობო ორგანიზაციის წარმომადგენლებს, ადვოკატთა ასოციაციას, იურიდიული დახმარების სამსახურს და სამეცნიერო სფეროს ორ წარმომადგენელს, ეს პროცესი იქნება მაქსიმალურად გამჭირვალე და ჩვენი ამოცანაა პროფესიონალი კეთილსინდისიერი კანდიდატის შერჩევა", - განაცხადა ანრი ოხანაშვილმა.

დამოუკიდებელმა დეპუტატმა ეკა ბესელიამ კი თქვა, რომ უზენაესი სასამართლოს მოსამართლეობის კანდიდატების მოსმენა უპასუხისმგებლო დამოკიდებულებით იწყება. ბესელიამ უკმაყოფილება გამოთქვა კანდიდატებთან ინტერვიუებისთვის განკუთვნილი დროის სიმცირის გამო.

"როდესაც ასეთ არადემოკრატიულ პროცედურას იღებ კომიტეტზე და 20 წუთს აძლევ დამოუკიდებელ დეპუტატებს, ეს ნიშნავს, რომ თუ ხუთი ადამიანი ისარგებლებს კითხვის დასმით 4-4 წუთიც არ გამოდის კითხვა-პასუხისთვის. სრულიად არასერიოზული მიდგომაა. მაშინ აიღოს და პირდაპირ გამოუცხადოს ნდობა, თუ არ სჭირდება ეს პროცედურა და არ არის მნიშვნელოვანი ეს პროცესი. ამ დროს საზოგადოებაში ყველამ უნდა დაინახოს ვის ვირჩევთ, ვინ არიან ეს ადამიანები", - განაცხადა ეკა ბესელიამ.

საკომიტეტო მოსმენას ასევე ესწრებიან არასამთავრობო ორგანიზაციების წარმომადგენლები, პარლამენტშია იუსტიციის უმაღლესი საბჭოს არამოსამართლე წევრი ანა დოლიძეც:

"უმკაცრესი კონტროლია აქ შემოსვლაზე. თაგვიც ვერ შემოაღწევს ამ შენობაში. ამის უკან არის ხალხის აზრის და ამ პროცესის სახალხოობის უდიდესი შიში. ზუსტად ისევეა ეს პროცესი სახალხო მოსმენა, როგორც იყო ცენტრალურ კომიტეტში მიმდინარე პროცესები. ამიტომ იმ ახალგაზრდა ადამიანებს, რომლებიც ამ პროცესს ატარებენ და ერთი და იმავე გზავნილებს იმეორებენ, მხოლოდ და მხოლოდ ოქტომბრელები შეიძლება ეწოდოთ. სამწუხაროდ, ეს არის ამ ფასადური პროცესის ბოლო ეტაპი, რომლითაც "ქართული ოცნება" ოფიციალურად გაიფორმებს იმ სისტემას, რომელიც ჯერ კიდევ 8 წლის წინ უნდა დაენგრია მას", - განაცხადა ანა დოლიძემ. 

პარლამენტს უზენაესი სასამართლოს მოსამართლეობის კანდიდატთა სია 7 სექტემბერს წარედგინა, მანამდე იუსტიციის უმაღლესმა საბჭომ პარლამენტში წარსადგენად უზენაესი სასამართლოს მოსამართლეობის 20 კანდიდატი შეარჩია.

საქართველოს პარლამენტში უზენაესი სასამართლოს მოსამართლეთა არჩევის პროცედურის შესახებ ვრცლად შეგიძლიათ ამ ბმულზე წაიკითხოთ.