დიმიტრი გაბუნია: ჩემი ინფორმაციით, შესაწყალებელთა სია ადმინისტრაციის უფროსის მოადგილემ შეადგინა

„ადმინისტრაციაში არსებობს შეწყალების დეპარტამენტი, რომელსაც ჰყავს თავისი კურატორი - ადმინისტრაციის უფროსის მოადგილე ანგი ხუციშვილი. ჩემი ინფორმაციით, ის ამ სიის შედგენით თვეების განმავლობაში იყო დაკავებული“, - ამის შესახებ პრეზიდენტის საპარლამენტო მდივანმა დიმიტრი გაბუნიამ პარლამენტში მისვლისას ჟურნალისტებთან განაცხადა.

მისი თქმით, დასამალი არაფერი აქვს. 

„როგორც კი პროკურატურა გამოძიებისთვის დამიძახებს, შესაბამის განცხადებას გავაკეთებ. პრეზიდენტმა ჩემს ნაწილთან დაკავშირებით ნათლად ისაუბრა, მაგრამ მაღალი საზოგადოებრივი ინტერესიდან გამომდინარე, კითხვებს მეც ვუპასუხებ. მივესალმები პროკურატურის მიერ გამოძიების დაწყებას - როცა დამიძახებენ, მაშინვე ვითანამშრომლებ. მეც მაინტერესებს კონკრეტულად ვინ შეადგინა ეს სია და პრეზიდენტს ვინ დაუდო. კატეგორიულად მიუღებელია თითის შვერა ჩემკენ - მდივნისკენ, რომელსაც არანაირი მონაწილეობა არ მიმიღია და ამის უფლებამოსილებაც არ მაქვს. ადმინისტრაციაში არსებობს შეწყალების დეპარტამენტი, რომელსაც ჰყავს თავისი კურატორი - ადმინისტრაციის უფროსის მოადგილე. ჩემი ინფორმაციით, ის ამ სიის შედგენით თვეების განმავლობაში იყო დაკავებული. მეც თქვენთან ერთად გავიგე სახელები მედიიდან და მეც მაინტერესებს - ვინ დაუდო სია პრეზიდენტს. ველი თადუმაძის უწყებაში მისვლას. რაც შეეხება ქოიავას საქმეს - ვის დასჭირდა ჩემი სახელის გათხვრა, ეს უკვე მე მაინტერესებს და ჩემი მოთხოვნით, დამოუკიდებელი ჟურნალისტური გამოძიება მიმდინარეობს. ამ საკითხს ასე არ დავტოვებ - ოჯახის წევრები და სამეგობრო განადგურებულები ვართ. არ არის გამორიცხული პროკურატურას მივმართო, რომ გამოიძიონ. ცამდე მართალი ვარ და საზოგადოება შეცდომაშია შეყვანილი“, - განაცხადა გაბუნიამ. 

პრეზიდენტის ადმინიტრაციაში ამ ეტაპზე რეორგანიზაცია მიმდინარეობს, ოფიციალურ ვებგვერდზე კი ადმინისტრაციის უფროსის მხოლოდ ერთი მოადგილის სახელი და გვარია მითითებული. არსებული ინფორმაციით, ადმინისტრაციის უფროსს ჰყავს მეორე მოადგილეც - ანგი ხუციშვილი. 

სალომე ზურაბიშვილს მკვლელობის მუხლით გასამართლებული მსჯავრდებულების შეწყალებასთან დაკავშირებით აკრიტიკებენ. პრესაში გამოითქვა მოსაზრება, თითქოს კონკრეტული მსჯავრდებულების შეწყალებას
პრეზიდენტის საპარლამენტო მდივანი დიმიტრი გაბუნია ლობირებდა. გაბუნია ყველა ბრალდებას უარყოფს. ამასთან, „იმედის კვირამ“ შეწყალებულ პატიმართა სიაში ნარკოდანაშაულისთვის მსჯავრდებულებიც იპოვა, მათ შორის ისეთებიც, ვინც ნარკოტიკების რეალიზების მცდელობისთვის და საქართველოში შემოტანისთვის დააკავეს.

„ევროპულმა საქართველომ“ პრეზიდენტის მიერ შეწყალებულთა საქმეზე გამოძიების დაწყების მოთხოვნით საქართველოს გენერალურ პროკურატურას 19 სექტემბერს მიმართა.

პროკურატურამ პრეზიდენტის მიერ შეწყალების საქმეებზე გამოძიება 20 სექტემბერს დაიწყო. ფაქტს უკვე გამოეხმაურა პრეზიდენტის ადმინისტრაცია. თავად პრეზიდენტმა კი პატიმრების შეწყალებაზე 18 სექტემბერს მორატორიუმი გამოაცხადა.