როგორ აფასებენ თბილისში ლავროვის განცხადებას

რუსეთის საგარეო საქმეთა მინისტრის განცხადება ოპოზიციაში დაცინვად აღიქვეს. სერგეი ლავროვის კომენტარს, რომ აუდიენცია ქართული მხარის თხოვნით შედგა, თბილისში უარყოფენ.  

თემაზე ჟურალისტებმა შეკითხვა დაუსვეს ვიცეპრემიერს, რეგიონული განვითარების მინისტრს, მაია ცქიტიშვილს. 

მისი თქმით, დიალოგი არის ერთადერთი საშუალება ქვეყნებს შორის პრობლემების გადასაჭრელად. 

რუსეთის საგარეო საქმეთა მინისტრ, სერგეი ლავროვთან შეხვედრის ინიციატივაზე განცხადებებს საგარეო უწყებაში ინსინუაციები უწოდეს. 

სერგეი ლავროვმა 28 სექტემბერს განაცხადა, რომ შეხვედრის ინიციატივა საქართველოს საგარეო საქმეთა მინისტრისგან, დავით ზალკალიანისგან მოდიოდა.

ნიუ-იორკში, რუსეთის და საქართველოს პირველი დიპლომატები ერთმანეთს 26 სექტემბერს შეხვდნენ. 

ზალკალიანის თქმით, ლავროვს პირდაპირ უთხრა, რომ დეოკუპაციისკენ ნაბიჯების გადადგმა აუცილებელია. 

მინისტრის განცხადებით, სერგეი ლავროვთან შეხვედრის ინიციატივა ეკუთვნოდა შვეიცარიის საგარეო საქმეთა მინისტრს, რომელსაც ის 25 სექტემბერს შეხვდა.

საგარეო უწყების ხელმძღვანელის თქმით, მისი მხრიდან მარტივი გადასაწყვეტი არ ყოფილა, დათანხმებოდა ამ შემოთავაზებას, თუმცა კონფლიქტის მოგვარების პროცესში ჩართულ ყველა ძირითად აქტორთან კონსულტაციის შემდეგ ეს აუდიენცია შედგა.

26 სექტემბერს ინფორმაცია გაავრცელა შვეიცარულმა მხარემაც. ტექსტში ეწერა, რომ „შვეიცარიის შუამავლობით და ინიცირებით შედგა შეხვედრა საქართველოს საგარეო საქმეთა მინისტრს, დავით ზალკალიანსა და  რუსეთის ფედერაციის საგარეო საქმეთა მინისტრს, სერგეი ლავროვს შორის“.