ლავროვთან შეხვედრის ინიციატივაზე განცხადებებს საგარეო უწყებაში ინსინუაციები უწოდეს

რუსეთის საგარეო საქმეთა მინისტრ, სერგეი ლავროვთან შეხვედრის ინიციატივაზე განცხადებებს საგარეო უწყებაში ინსინუაციები უწოდეს. 

ზალკალიანის უწყების პრესისა და ინფორმაციის დეპარტამენტში კიდევ ერთხელ განმარტეს, რომ ქართველ და რუს დიპლომატებს შორის შეხვედრა შედგა შვეიცარიის კონფედერაციის ორგანიზებით და ჩართულობით. 

„აღნიშნული შეხვედრის შესახებ მისმა მონაწილე სამივე მხარემ გაავრცელა ინფორმაცია, სადაც აღნიშნულია, რომ საქართველოს და რუსეთის საგარეო საქმეთა მინისტრების შეხვედრა გაეროს გენერალური ასამბლეის ფარგლებში შედგა შვეიცარიის კონფედერაციის ორგანიზებით და ჩართულობით. სხვა დანარჩენი გახლავთ ინსინუაციები თემაზე“, - განუცხადეს Imedinews-ს საგარეო უწყების პრესისა და ინფორმაციის დეპარტამენტში. 

რამდენიმეწლიანი პაუზის შემდეგ, ნიუ-იორკში, რუსეთის და საქართველოს პირველი დიპლომატები ერთმანეთს 26 სექტემბერს შეხვდნენ. 

ზალკალიანის თქმით, ლავროვს პირდაპირ უთხრა, რომ დეოკუპაციისკენ ნაბიჯების გადადგმა აუცილებელია. 

მინისტრის განცხადებით, სერგეი ლავროვთან შეხვედრის ინიციატივა ეკუთვნოდა შვეიცარიის საგარეო საქმეთა მინისტრს, რომელსაც ის 25 სექტემბერს შეხვდა.

საგარეო უწყების ხელმძღვანელის თქმით, მისი მხრიდან მარტივი გადასაწყვეტი არ ყოფილა, დათანხმებოდა ამ შემოთავაზებას, თუმცა კონფლიქტის მოგვარების პროცესში ჩართულ ყველა ძირითად აქტორთან კონსულტაციის შემდეგ ეს აუდიენცია შედგა.

26 სექტემბერს ინფორმაცია გაავრცელა შვეიცარულმა მხარემაც. ტექსტში ეწერა, რომ „შვეიცარიის შუამავლობით და ინიცირებით შედგა შეხვედრა საქართველოს საგარეო საქმეთა მინისტრს, დავით ზალკალიანსა და  რუსეთის ფედერაციის საგარეო საქმეთა მინისტრს, სერგეი ლავროვს შორის“. 

ასევე, აღნიშნული იყო, რომ შვეიცარიას დიალოგის ხელშეწყობის მიმართულებით დიდი ხნის გამოცდილება აქვს. 2009 წლის მარტიდან, ის წარმოადგენს რუსეთის ინტერესებს თბილისში და საქართველოს ინტერესებს მოსკოვში“. 

სერგეი ლავროვმა ორივე მხარისგან განსხვავებული ინფორმაცია გაავრცელა, როდესაც განაცხადა, რომ შეხვედრის ინიციატივა საქართველოს საგარეო საქმეთა მინისტრისგან, დავით ზალკალიანისგან მოდიოდა.

2009 წლის მარტში საქართველოში შვეიცარიის საელჩოს რუსეთის ფედერაციის ინტერესების სექცია და რუსეთის ფედერაციაში შვეიცარიის საელჩოს საქართველოს ინტერესების სექცია გაიხსნა.