გახარია ოკუპაციაზე: ჩვენი ყველა რეაქცია იქნება საერთაშორისო პარტნიორებთან შეთანხმებული და მშვიდობიანი

„ყველა სახის რეაქცია ჩვენი მხრიდან იქნება საერთაშორისო პარტნიორებთან შეთანხმებული და მათთან სრულ სინქრონში,“ - ეს განცხადება მედიასთან ზუგდიდში საქართველოს პრემიერმინისტრმა საოკუპაციო ხაზთან განვითარებული მოვლენების შეფასებისას გააკეთა. 

„ჩვენი ტერიტორიული მთლიანობის აღდგენა ჩვენი ყოველდღიური შრომით უნდა მოხდეს, იმიტომ რომ ეს ყველა სახის რეაქცია ჩვენი მხრიდან იქნება ჩვენს საერთაშორისო პარტნიორებთან შეთანხმებული და მათთან სრულ სინქრონში.ქვეყანა იყოს კიდევ უფრო დემოკრატიულო და ეკონომიკა კიდევ უფრო მიმზიდველი და ძლიერი. ჩვენი ტერიტორიები რაც დავკარგეთ ომით, უნდა აღვიდგინოთ მშვიდობით. ეს არის ჩვენი სახელმწიფოს პრაგმატული პოლიტიკის ძირითადი საფუძველი. რა თქმა უნდა ჩვენ ამ გზას გავაგრძელებთ,“ - განაცხადა გახარიამ.  

მისი თქმით, ყველა ის გამოწვევა, რომელსაც მოქალაქეები საუბედუროდ ყოველდღე ხვდებიან, ის გატაცებები რომლებიც ხდება, ყველა ამ ნაბიჯზე ხელისუფლების პასუხი პასუხი იქნება პრაგმატული და ცივი გონებით მიღებული: „ ეს არის ჩვენი მკაფიოდ გააზრებული გადაწყვეტილება. ეს არის ჩვენი გაცხადებული პოლიტიკა რომელსაც გავაგრძელებთ. დღეს საქართველოში გვაქვს საოკუპაციო ხაზი, რომელთან დაკავშირებითაც ყველა განვითარება და ინსტალირება რაიმე ღობის, რა თქმა უნდა ეს არის ოკუპაციის დამადასტურებელი ფაქტი,“- განაცხადა გახარიამ.  

24 ოქტომბერს, „ევროკავშირის მონიტორინგის მისიის შეუიარაღებელი პატრული ჩორჩანა-წნელისის ტერიტორიაზე სამხრეთ ოსეთის უსაფრთხოების ძალების შეიარაღებულმა წარმომადგენლებმა მცირე ხნით დააკავეს“. 

მანამდე კი ცხინვალის საოკუპაციო რეჟიმმა ევროკავშირის მონიტორინგის მისია ე.წ. საზღვრის დარღვევაში დაადანაშაულა. მომხდარს გამოეხმაურა საგარეო უწყება. იუსტიციის მინისტრმა კი სადამკვირვებლო მისიის წევრების დაკავებას უპრეცედენტო და ზღვარგადასული ფაქტი უწოდა. ევროკავშირი კი დამკვირვებლების დაკავების ფაქტზე დიპლომატიურ რეაგირებას გეგმავს. 

რამდენიმე დღის წინ კი, ცხინვალის ოკუპირებული რეჟიმის ე.წ. უშიშროების სამსახურმა ქართული სპეცსამსახურები სოფელ წნელისის მონაკვეთზე მასშტაბური პროვოკაციის მოწყობის დაგეგმვაში დაადანაშაულა. თავის მხრივ, საქართველოს სახელმწიფო უსაფრთხოების სამსახურმა განმარტა, რომ მსგავსი პროვოკაციული განცხადებები იმ დეზინფორმაციული კამპანიის ნაწილია, რომელსაც, განსაკუთრებით, ბოლო პერიოდში, აქტიურად იყენებენ საოკუპაციო ძალები.