კობახიძე: არჩევნები 85%-იანი გამარჯვებით დავასრულეთ, რაც საზოგადოების განწყობას აჩვენებს

„ქართულმა ოცნებამ“ დამაჯერებელი გამარჯვება მოიპოვა, ჩვენ ეს არჩევნები 85%-იანი გამარჯვებით დავასრულეთ.  შედეგი აჩვენებს იმას, თუ როგორია საზოგადოების განწყობა, - ამის შესახებ პარტია ,,ქართული ოცნება - დემოკრატიული საქართველოს“ აღმასრულებელმა მდივანმა, ირაკლი კობახიძემ „ქრონიკას“ განუცხადა. 

თავისივე თქმით, შუალედურ არჩევნებში მოპოვებული შედეგი მეტყველებს იმაზე, რომ შემდეგ არჩევნებზე ,,ქართული ოცნება“ დამაჯერებელ გამარჯვებას მოიპოვებს. 

,,გუშინ, სამ ოლქში - მარტვილის, ადიგენის და ლაგოდეხის საარჩევნო ოლქებში, საკრებულოს წევრების არჩევნები გაიმართა. როგორც მოგეხსენებათ, ოპოზიციამ ორ ოლქში საერთოდ ვერ გარისკა ჩვენს წინააღმდეგ  კანდიდატების დაყენება, მათ კანდიდატი მხოლოდ ერთ, ლაგოდეხის საარჩევნო ოლქში დააყენეს, სადაც „ქართულმა ოცნებამ“ დამაჯერებელი გამარჯვება მოიპოვა. ჩვენ ეს არჩევნები 85%-იანი გამარჯვებით დავასრულეთ. ამ ოლქში, ოპოზიციის წარმომადგენელმა 15%-ზე ნაკლები მიიღო.

ადგილობრივ არჩევნებს საკმაოდ დიდი მნიშვნელობა ენიჭება, იგი განიხილება როგორც ტესტი დიდ არჩევნებამდე. აქედან გამომდინარე, აღნიშნული არჩევნები განსაკუთრებული ყურადღების ქვეშ იყო, მათ შორის აფენში „ევროპული საქართველოს“ წარმომადგენლები იყვნენ მობილიზებულები. შედეგი აჩვენებს იმას, თუ როგორია საზოგადოების განწყობა. რამდენიმე კვირის განმავლობაში ჩვენ გვქონდა იმის საშუალება, რომ მოსახლეობასთან გვესაუბრა იმაზე, თუ როგორ გვესახება ზოგადად ქვეყნის განვითარება და მთელი რიგი მიმართულებებით ადგილზე ვითარების გაუმჯობესება. დამაჯერებელი გამარჯვება, სწორედ, ამან განაპირობა. მე ვფიქრობ, 15% ზუსტად ის მაქსიმალური შედეგია, რაც საპარლამენტო არჩევნებზე შეიძლება აიღოს „ნაციონალურმა მოძრაობამ“ ყველა განშტოებით. ეს შედეგი მეტყველებს იმაზე, რომ ჩვენ შემდეგ არჩევნებზე, აუცილებლად, დამაჯერებელ გამარჯვებას მოვიპოვებთ.

რამდენიმე თვის წინ ჩვენ გვქონდა არჩევნები 6 ოლქში, სადაც ამომრჩევლის 12%-მა მიიღო მონაწილეობა და იქ მთლიანობაში 60%-ზე მეტი ავიღეთ. მე ვგულისხმობ ზუგდიდში, მარნეულსა და სხვა ოლქებში ჩატარებულ არჩევნებს. ეს ყველაფერი მეტყველებს იმაზე, რომ შემდეგ არჩევნებში ჩვენ მნიშვნელოვნად ავცდებით 50%-იან მაჩვენებელს - ვფიქრობ, 60% არის რეალური შედეგი”, - განაცხადა ირაკლი კობახიძემ.

27 ოქტომბერს გამართულ შუალედურ არჩევნებზე სამივე ოლქში „ოცნების“ კანდიდატებმა გაიმარჯვეს.