განათლების რეფორმისთვის სამინისტრომ დონორებისგან ₾600 მილიონი მოიზიდა

განათლების მინისტრის მიხეილ ბატიაშვილის განცხადებით, განათლების კომპლექსური რეფორმისთვის უწყებამ ბოლო ერთი წლის განმავლობაში საერთაშორისო დონორი ორგანიზაციებისგან 600 მილიონი ლარი მოიზიდა. ამის შესახებ ბატიაშვილმა „განათლება დასაქმებისთვის” (Skills4Jobs) პროგრამის მეორე ფაზა ოფიციალურად გახსნის ღონისძიებაზე თქვა. ინფორმაციას სამინისტრო ავრცელებს.

მიხეილ ბატიაშვილმა, საერთაშორისო დონორ ორგანიზაციებსა და პანრტიორებს, რომლებიც რეფორმის განხორციელების პროცესში სამინისტროსთან მჭიდროდ თანამშრომლობენ, მადლობა გადაუხადა.

„განათლების კომპლექსური რეფორმის განსახორციელებლად, სამინისტრომ ბოლო ერთი წლის განმავლობაში საერთაშორისო დონორი ორგანიზაციებისგან 600 მილიონი ლარი მოიზიდა. ამ კუთხით, დღევანდელი დღეც განსაკუთრებულია, რადგან, პროექტი „დასაქმება, პროფესიული განათლება და გადამზადება“ მეორე ფაზის ფარგლებში, ევროკავშირი და საქართველოს მთავრობა ახალ ხუთწლიანი პროგრამას იწყებენ, რომლის ბიუჯეტი 48.85 მილიონი ევროა (დაახლოებით 156 მილიონი ლარი). უმნიშვნელოვანესია, რომ პროექტი მიზნად ისახავს საქართველოს მასშტაბით შესაბამისი უნარებისა და პროფესიული განათლების, სწავლების, მეწარმეობის დარგში არსებული მომსახურების და საგანმანათლებლო შესძლებლობების თანხვედრას, მათ შორის ახალგაზრდებისთვის, ქალებისა და მოწყვლადი ჯგუფებისთვის“, - განაცხადა მიხეილ ბატიაშვილმა.

განათლების მასშტაბური რეფორმის პრეზენტაცია მარტის დასაწყისში გაიმართა. რეფორმის ერთ-ერთი მთავარი პრინციპი ის არის, რომ 2022 წელს განათლებაზე გათვალისწინებული თახნა მშპს 6%-ს გაუტოლდება. ახალი ინიციატივით, 2019 წლის ბიუჯეტში, განათლების სექტორზე 1, 6 მილიარდი გამოიყოფა, 2020 წელს - 2 მილიარდი, 2021 წელს -  2,5 მილიარდი, ხოლო 2022 წელს ის გაუტოლდება მთლიანი შიდა პროდუქტის 6 პროცენტს, ანუ 3,4 მილიარდ ლარს.

რეფორმა ასევე გულისხმობს მასწავლებლებისთვის ხელფასების ზრდას, რაც 2020 წლის ბიუჯეტშიც იქნება გათვალისწინებული. რეფორმის ფარგლებში სახელმწიფომ საპენსიო ასაკს მიღწეულ პედაგოგებს შეთავაზებები გაუკეთა.