ახალქალაქში ნაგვის ურნებზე ენზელ მკოიანის პლაკატები გააკრეს

ახალქალაქში ნაგვის ურნებზე „ქართული ოცნების” დეპუტატის, ენზელ მკოიანის პლაკატები გააკრეს. როგორც jnews.ge წერს, პლაკატები 26 ოქტომბერს გამოჩნდა, თუმცა მეორე დღეს უკვე აღარ იყო. 

პლაკატებზე სომხურ ენაზე გაკეთებული იყო წარწერა: „მე არ შევასრულებ ჩემს დაპირებებს, არ შევასრულებ ჩემს საპარლამენტო მოვალეობებს, მე გამყალბებელი ვარ და არჩევნებს გავყალბებ. თქვენი ხმები ვიყიდე. მოსახლეობა გამოვიყენე და მოვატყუე, რომ გამდიდრდებიან, მე ბოროტად ვიყენებ თქვენს სახელს...”

თავად დეპუტატი ამასთან დაკავშირებით კომენტარი არ გაუკეთებია, თუმცა მისი ბიუროს წევრმა არშაკ ბდოიანმა „სამხრეთის კარიბჭეს“ უთხრა, რომ პლაკატების ავტორები ის ადამიანები არიან, ვისაც მკონიანთან კონფლიქტი აქვს. 

„სპეციალურად წერენ ნაგვის ყუთებზე, იმიტომ, რომ ვინც ეს პლაკატები გააკეთა და ნაგვის ყუთებზე დააკრო, ამ ხალხს იმედი აქვს ნაგვის ყუთების ხალხის [ვის გულსხმობს ბდოიანი არ აკონკრეტებს ს.კ]. დანარჩენი მშრომელი და ნორმალური ხალხი 2020 წელს მოვა არჩევნებზე და თქვენ თვითონაც დარწმუნდებით, რომ ხმას ენზელ მკოიანს მისცემენ. ვინ მუშობს ახლა? რა საკვირველია ალბათ ის ხალხი, ვინც შემჩნეულია კონფლიქტურ სიტუაციაში მკოიანთან. ამ ხალხის რაოდენობა დაწყებული 2000 წლიდან არის 3-4 პიროვნება, რომლებიც ვიცით რომ ახლოს არიან ამ მოძრაობასთან, ეროვნულ, ნაციონალურ მოძრაობასთან“, - თქვა არშაკ ბდოიანმა.

2019 წლის ივლისში ნინოწმინდის ბაღების გაერთიანების დირექტორმა დეპუტატი ენზელ მკოინია სექსუალურ შევიწროებაში დაადანაშაულა. დეპუტატმა სექსუალურ შევიწროებასთან დაკავშირებულ ბრალდებებს ბინძური კამპანია უწოდა. 

ფოტო: "სამხრეთის კარიბჭე"/ თაკო ფეიქრიშვილი