მეუფე პეტრე: თუ პრეზიდენტმა მამალაძე არ შეიწყალა ეს იქნება წინასწარ დადგმული სცენარი

ჭყონდიდის ეპარქიის ყოფილი მიტროპოლიტის, მეუფე პეტრეს შეფასებით, თუ პრეზიდენტმა ე.წ. ციანიდის საქმეზე მსჯავრდებული დეკანოზი გიორგი მამალაძე არ შეიწყალა ეს მიანიშნებს, რომ იქნება საპატრიარქოსთან შეთანხმებული და დადგმული სცენარი.

მეუფე პეტრემ დღეს, ჭყონდიდის ეპარქიაში გამართულ გამოსამშვიდობებელ პრესკონფერენციაზე სალომე ზურაბიშვილს მოუწოდა პატივი სცეს სინოდის გადაწყვტილებას და დააკმაყოფილოს შუამდგომლობა შეწყალებასთან დაკვშირებით.

„მიმაჩნია, რომ თუ პრეზიდენტმა ისევ „დაფრანგულობის“გზა აირჩია და თავი შეიკავა წმინდა სინოდისა და პატრიარქის მიმართვაზე, მაშინ როდესაც ის ამბობს, რომ გმობს პატრიარქის შეურაცხყოფას, ასევე დასაგმობი იქნება პატრიარქის თხოვნის იგნორირება. ამით კიდევ ერთხელ დადასტურდება მისი საქციელი „დაფრანგულობის“ ფორმატში. გამოდის, რომ ეს არის დადგმული სცენარი, წინასწარ შეთანხმებული გეგმა, რომ საპატრიარქომ მოიხსნას პასუხისმგებლობა მორალური, უშუამდგომლოს, მაგრამ პრეზიდენტმა თქვას უარი,“- განაცხადა მეუფე პეტრემ.

მეუფე პეტრე აცხადებს, რომ საპატრიარქომ დეკანოზ მამალაძისთვის სასჯელის გადავადების მიზნით იუსტიციის სამინისტროს უნდა მიმართოს.

„საპატრიარქომ სასწრაფოდ უნდა მიწეროს წერილი იუსტიციის მინისტრს, ვინაიდან მიზნები იყო ჯანმრთელობის მდგომარეობის გაუარესება, არსებობს კანონი, რის თანახმადაც ხდება პატიმრის სასჯელის გადავადება მკურნალობის მიზნით. პატიმარს ათავისუფლებენ ციხიდან სამკურნალოდ, შემდეგ ის ისევ უბრუნდება სასჯელაღსრულების დაწესებულებას. აი ამ პუნქტით შესაძლებელია, რომ თუ პრეზიდენტი გახდება არაადეკვატური, იუსტიციის სამინისტრომ მიიღოს ეს გადაწყვეტილება და დააკმაყოფილოს საპატრიარქოს თხოვნა. პრეზიდენტის გუშინდელი განცხადებაც კი საკმარისია, როცა ჩვენ მოგვიწოდებდა პატრიარქის პატივისცემისაკენ, გამოდის რომ თვითონ ორმაგი სტანდარტით ფარისევლობს, როდესაც პატრიარქის თხოვნას არ სცემს პატივს. ამით ის შეურაცხყოფას აყენებს, არამხოლოდ პატრიარქს, მთელ წმინდა სინოდს, მთელ საქართველოს მართლმადიდებურ ეკლესიას,“- განაცხადა მეუფე პეტრემ.

3 ნოემბერს საკვირაო წირვის შემდეგ სალომე ზურაბიშვილმა დეკანოზის შეწყალების თემაზე განაცხადა,რომ ძალიან გაუფრთხილდება გადაწყვეტილებას. 

დეკანოზის შეწყალების თემას ზურაბიშვილის ადმინისტრაცია 2 ნოემბერს გამოეხმაურა და უარყო გიორგი მამალაძის შეწყალებასთან დაკავშირებულ საკითხებზე გავრცელებული ინფორმაცია. 

მანამდე მედიაში ვრცელდებოდა ცნობა, რომ სალომე ზურაბიშვილი დეკანოზ გიორგი მამალაძეს, სავარაუდოდ, 23 ნოემბერს, გიორგობის დღესასწაულზე შეიწყალებდა.

საპატრიარქოს პრესსამსახურის უფროსმა Imedinews-ს 31 ოქტომბერს განუცხადა, რომ შეწყალების შუამდგომლობით ადმინისტრაციას მალე მიმართავენ.

31 ოქტომბერს, სინოდის სხდომაზე მიიღეს გადაწყვეტილება, რომ დეკანოზ გიორგი მამალაძეს, რომელსაც შეჩერებული აქვს მღვდელმსახურება, გაეწიოს შუამდგომლობა საქართველოს პრეზიდენტთან შეწყალების თაობაზე, მისი ოჯახის რთული მდგომარეობისა და  არაერთგზის თხოვნის გათვალისწინებით.