პარლამენტის პიკეტირებაში მონაწილეობას ელისაშვილის „სამოქალაქო მოძრაობაც“ მიიღებს

პარლამენტის შენობის პიკეტირებაში მონაწილეობას „სამოქალაქო მოძრაობაც“ მიიღებს. ამის შესახებ „ტვ პირველის“ ეთერში მოძრაობის ლიდერმა ალეკო ელისაშვილმა განაცხადა.

„პარლამენტის წინ შეკრებილი პარტიების წარმომადგენლები ერთმანეთს ვერ ვიტანთ, მაგრამ გაგვაერთიანა ერთმა მოთხოვნამ - დაინიშნოს ვადამდელი პროპორციული არჩევნები. ჩვენ მთავრობას სახის შენარჩუნებაში ვეხმარებით, რომ რასაც ივანიშვილი რამდენიმე თვის წინ მთელ მსოფლიოს დაპირდა, ის შეასრულოს. თუ ეს წესიერი და სინდისერი მოთხოვნა არ დაკმაყოფილდა, ყველაფერი რადიკალიზაციისკენ წავა. მეზიზღება რევოლუციები და გადატრიალებები, მაგრამ მე და ჩემი მომხრეებიც იძულებულები ვიქნებით, პიკეტირებაში მივიღოთ მონაწილეობა. ერთადერთი ადეკვატური განცხადება, რომელიც ხელისუფლების მხრიდან მოვისმინე, იყო თამარ ჩუგოშვილის და კიდევ რამდენიმე დეპუტატის უმრავლესობიდან წასვლა. მინდა მივმართო „ქართულ ოცნებაში“ ყველას, ვისაც გონება და სინდისი შერჩა - ძალიან ცუდად წავა საქმე, თუ ეს მოთხოვნა არ შესრულდება“, - განაცხადა ელისაშვილმა.

ოპოზიციის აქცია პარლამენტის წინ 15:00 საათზე დაიწყო, მოგვიანებით კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებშია: „ვადამდელი პროპორციული არჩევნები, მთავრობის გადადგომა, სამოქალაქო საზოგადოების წესით დაკომპლექტებული ცესკო, პოლიტპატიმრების გათავისუფლება“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.