თინა ბოკუჩავა არ გამორიცხავს რომ ოპოზიციამ სხვა სახელმწიფო უწყებების ბლოკირებაც მოახდინოს

„ნაციონალური მოძრაობის“ წევრი, თინა ბოკუჩავა არ გამორიცხავს, რომ ოპოზიციამ სხვა სახელმწიფო უწყებების ბლოკირებაც მოახდინოს. 

ბოკუჩავას განცხადებით, „ბიძინა ივანიშვილს 2020 წლამდე მშვიდობიანად მისვლის შანსი ჰქონდა, მაგრამ მან ქართველ ხალხზე იძალადა და სისხლის ფასად მოპოვებული პროპორციული არჩევნები წაართვა“. 

„ამიტომ, ჩვენ იძულებული გავხდით, გამოვსულიყავით ქუჩაში, რომ დაგვეცვა ჩვენი კონსტიტუცია, უფლებები, ქვეყანა. რა თქმა უნდა, პიკეტი ხვალაც გაგრძელდება და არ გამოვრიცხავ, რომ კანცელარიისკენ გაიშალოს, დივერსიფიკაცია მოხდეს უკვე ჩვენი პროტესტის ფორმების“, - განუცხადა ბოკუჩავამ „მთავარ არხს“. 

ოპოზიციის აქცია პარლამენტის წინ 15:00 საათზე დაიწყო, მოგვიანებით კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.