ვოლსკი სიტუაციის გამწვავებას პოლიტიკურ ოპონენტებს აბრალებს

„ქართული ოცნების“ ერთ-ერთი ლიდერი გია ვოლსკი შექმნილ კრიზისში ოპონენტებს ადანაშაულებს. ამის შესახებ მან ტელეკომპანია „იმედის“ გადაცემაში „კვირის თემა“ განაცხადა.

მისი თქმით, ოპოზიციის მხრიდან გერმანული მოდელის შეთავაზება იმის მანიშნებელია, რომ ის დიალოგისთვის მზად არ არის. 

„შეთავაზება ამ სისტემის არის უკვე დადასტურება, შეფარული მიზანი იმისათვის, რათა რევოლუციური სცენარი განავითარონ და არანაირი დიალოგისთვის ესენი არ იყვნენ მზად. ყველა წინაპირობა არსებობდა იმისთვის, რომ ეს მდგომარეობა ჩამცხრალიყო და მოსულიყო წესრიგში. დღე არ გამოეტოვებინათ, რომ ეს სიტუაცია არ აეყირავებინათ. მე არა ვარ პარანოიდალური აზროვნების ადამიანი, მაგრამ ვუშვებ, რომ ამ თემას ავითარებდნენ იმიტომ, რომ არც გერმანულში, არც პროპორციულში, არც ავსტრალიურში არავითარი შანსი არ აქვთ წინ წასვლის, იმაზე მეტად, რაც აქვთ. მათ გააანალიზეს სიტუაცია და ყველაფერი გააკეთეს დაპირისპირებისთვის“, - განაცხადა ვოლსკიმ.  

„ქართული ოცნების“ ერთ-ერთი ლიდერის თქმით, იმ საქმეების და პროექტების ფონზე, რაც ბიძინა ივანიშვილმა და „ქართუმ“ გააკეთა, მმართველ გუნდის გამარჯვებას არცერთი საარჩევნო სისტემის პირობაში საფრთხე არ ემუქრება, ამიტომ ლაპარაკი იმაზე, რომ „ოცნებამ“ რაღაც კვლევა ჩაატარა, არასერიოზულია.

მანამდე, გადაცემაში „კვირის თემა“, „ევროპული საქართველოს“ ლიდერმა, უმრავლესობის მიერ პროპორციულ სისტემაზე ცვლილებების ჩაგდება და ივანიშვილის დაპირების არშესრულება იმას დაუკავშირა, რომ „ოცნებამ“ სავარაუდოდ ჩაატარ კვლევა და მიხვდა, რომ პროპორციული სისტემის პირობებში არჩევნებში დამარცხდებოდა.  

რუსთაველის გამზირზე, პარლამენტთან საპროტესტო აქციის ძირითადი ნაწილი დასრულდა, თუმცა ადგილზე ისევ არიან ოპოზიციის წარმომადგენლები და ასევე აქციის მონაწილეები, რომლებმაც პარლამენტის შესასვლელები დაბლოკეს. 

ოპოზიციის აქცია პარლამენტის წინ 15:00 საათზე დაიწყო, მოგვიანებით კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.