ვაჟა გაფრინდაშვილის მხარდასაჭერად „თეთრი ხალათების აქცია“ გაიმართა

მედიკოსები ვაჟა გაფრინდაშვილს სოლიდარობას უცხადებენ და მის გათავისუფლებას ითხოვენ. თბილისში, ბათუმსა და რამდენიმე რეგიონში „თეთრი ხალათების აქცია“ გაიმართა. ექიმები რუს კოლეგებს მოუწოდებენ, სოლიდარობა გამოუცხადონ ქართველ ექიმს. ბათუმში აქცია სამედიცინო დაწესებულება “მედცენტრის” ორგანიზებით გაიმართა.

ბათუმი, აქცია. ფოტო: დარეჯან ჩხიკვაძე

„ვაჟას საქციელი არის გმირობა. ჩვენ გვეამაყება რომ მისი მეგობრები და კოლეგები ვართ. ეს არის სწორედ ქვეყნის ინტერესების გამოხატვა და ასეთი საქციელით,ასეთი ერთად დგომით აშენდება ქვეყანა. თავისუფლება ვაჟას“, - განაცხადა შორენა ვაშაძემ.

დღეს 12:00 საათზე, სამედიცინო დაწესებულებების წინ, 5 წუთის განმავლობაში, ყველა, ერთად დგომით, პროტესტს გამოხატავს საოკუპაციო ხაზთან ცნობილი ექიმის უკანონოდ დაკავების გამო.

ვაჟა გაფრინდაშვილს სოლიდარობა კახეთშიც გამოუცხადეს. თელავის რეფერალური საავადმყოფოს ექიმებმა კლინიკის წინ მდუმარე აქცია გამართეს და საოკუპაციო რეჟიმის ქმედება დაგმეს.

კახეთი, „თეთრხალათიანების აქცია“ ფოტო: კახაბერ კუპატაძე

ფოთსა და ზუგდიდში ექიმ ვაჟა გაფრინდაშვილის მხარდამჭერი „თეთრი ხალათების“ აქცია გაიმართა. აქციის მონაწილეების თქმით, ისინი საოკუპაციო ხაზთან ცნობილი ექიმის უკანონოდ დაკავების ფაქტს გმობენ და იმედოვნებენ, რომ პრობლემა მალე აღმოიფხვრება და გაფრინდაშვილს უახლოეს მომავალში გაათავისუფლებენ.

ზუგდიდი, „თეთრხალათიანების აქცია“ ფოტო: პაპუნა შუშანია

რუსთავში მედიკოსები ხელისუფლებას და საერთაშორისო ორგანიზაციების მიმართავენ და მათი კოლეგის დაუყოვნებლივ გათავისუფლებას ითხოვენ.

თავისუფლება „ვაჟა გაფრინდაშვილს“ - თეთრი ხალათების აქციას საქართველოს დავით აღმაშენებლის სახელობის უნივერსიტეტის მედიცინის ფაკულტეტის სტუდენტებიც შეუერთდნენ.

ფოტო: ნინო ვაშაკიძე

"თავისუფლება ვაჟა გაფრინდაშვილს" - თეთრი ხალათების აქციას საქართველოს დავით აღმაშენებლის სახელობის უნივერსიტეტის მედიცინის ფაკულტეტის სტუდენტებიც შეუერთდნენ.

თავისუფლება ვაჟა გაფრინდაშვილს! თეთრხალათიანთა აქციას „გორმედის“ ქსელის კლინიკების - გორის საუნივერსიტეტო კლინიკის, დედათა და ბავშვთა სამედიცინო ცენტრ ,,იავნანას“, ქარელის ცენტრალური საავადმყოფოს და ხაშურის კლინიკური საავადმყოფოს მედპერსონალიც უერთდება. ზუსტად 12:00 საათზე,  სამედიცინო დაწესებულებების წინ, 5 წუთის განმავლობაში, ერთად დგომით,მათ პროტესტი გამოხატეს საოკუპაციო ხაზთან ცნობილი ექიმის უკანონოდ დაკავების გამო.მშვიდობიანი აქციის მონაწილეებმა ცნობილი ტრავმატოლოგ-ორთოპედის ცხინვალის წინასწარი დაკავების იზოლატორიდან გათავისუფლება მოითხოვეს და დახმარებისკენ საერთაშორისო სამედიცინო ორგანიზაციებს მოუწოდეს.

სოლიდარობა ვაჟა გაფრინდაშვილს-„თეთრი ხალათების“ აქციას ქუთაისელი ექიმებიც შეუერთდნენ. სამედიცინო სფეროს წარმომადგენლები კლინიკების ეზოში შეიკრიბნენ და ვაჟა გაფრინდაშვილს სოლიდარობა გამოუცხადეს. მათი თქმით, ვაჟა გაფრინდაშვილი არის გმირობის მაგალითი, ის ოკუპანტების მიერ უკანონოდ არის დაკავებული და დაუყოვნებლივ უნდა გათავისუფლდეს.

ფოტო: ხათუნა მაისურაძე

,,აღშფოთებული ვართ ექიმის უკანონი დაკავების გამო, რომელიც პროფესიულ საქმიანობას ასრულდება. სოლიდარობას ვუცხადებთ მას. ჩვენი მშვიდობიანი აქციით ვუერთდებით "თეთრი ხალათების" აქციას" - ამბობენ მედიკოსები.

სახელმწიფო მინისტრის, ქეთევან ციხელაშვილის განცხადებით, რამდენიმე არხით მიღებული ინფორმაციით, ექიმ ვაჟა გაფრინდაშვილს ცხინვალის საოკუპაციო რეჟიმი უახლოეს დღეებში გაათავისუფლებს.

16 ნოემბერს, აშშ-ის საელჩომ ვაჟა გაფრინდაშვილის დაუყოვნებლივ გათავისუფლება მოითხოვა.

ექიმის დაკავების საკითხს განცხადებები მოჰყვა საგარეო საქმეთა და ჯანდაცვის სამინისტროებში. პარლამენტის თავმჯდომარემ, არჩილ თალაკვაძემ განაცხადა, რომ ექიმის დაპატიმრებით საოკუპაციო რეჟიმი ადამიანურ ღირებულებებს კიდევ ერთხელ გაემიჯნა.

ფაქტს გამოეხმაურა სახალხო დამცველიც. პრეზიდენტმა ზურაბიშვილმა კი საერთაშორისო ორგანიზაციებს მიმართა.

15 ნოემბერს ექიმ ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის დარღვევას ედავებიან. დაკავებულის კოლეგების ინფორმაციით, ოკუპანტები და ოსი სეპარატისტები ექიმ ვაჟა გაფრინდაშვილისაგან ერთადერთ რამეს ითხოვენ: აღიაროს საზღვრის გადაკვეთა, რაზეც ის კატეგორიულ უარს აცხადებს.