აკაკი ზოიძე პროპორციული სისტემის შესახებ რეფერენდუმს ითხოვს

ჯანმრთელობის დაცვისა და სოციალურ საკითხთა კომიტეტის თავმჯდომარე აკაკი ზოიძე 2020 წელს პროპორციულ საარჩევნო სისტემაზე გადასვლის საკითხზე რეფერენდუმის ჩატარების ინიციატივით გამოდის. ამის შესახებ მან ბრიფინგზე განაცხადა.

„გადავწყვიტე, საჯაროდ გამეჟღერებინა და მიმემართა პარტია „ქართული ოცნების“ თავმჯდომარისა და პოლიტსაბჭოსთვის, რათა მათ მიიღონ ზომები უმოკლეს ვადაში 2020 წელსვე პროპორციულ საარჩევნო სისტემაზე გადასვლასთან დაკავშირებით რეფერენდუმის ან პლებისციტის ჩატარებაზე. ღრმად მწამს, რომ ეს გადაწყვეტილება აგვაცილებს საზოგადოებაში პოლარიზაციის გაღრმავებას. მივმართავ ყველას, უპირველესყოვლისა, მმართველი გუნდის იმ წევრებს, ვინც ამ სისტემაზე გადასვლას მხარი არ დაუჭირა - გამოვიყენოთ პლებისციტამდე თუ რეფერენდუმამდე დარჩენილი დრო საზოგადოებასთან სამუშაოდ, რათა ჩვენთვის და ქვეყნისთვის სასურველი შედეგი მივიღოთ. ამასთან ერთად, აუცილებლად უნდა შევთანხმდეთ, რომ შედეგები იქნება სავალდებულო და უპირობო მოქმედების სახელმძღვანელო ყველა ჩვენგანისთვის. ხალხი ბრძენია, საზოგადოება არის საკმარისად პოლიტიკურად მომწიფებული, რომ პოლიტიკური დემაგოგიისგან გამოარჩიოს ჭეშმარიტების მარცვალი, ანუ რატომ არის პროპორციული საარჩევნო სისტემა ამ სიტუაციაში ყველაზე კარგი გამოსავალი“, - განაცხადა ზოიძემ.

კითხვაზე, როგორ ჩატარდება რეფერენდუმი საქართველოს ტერიტორიის 20%-ის ოკუპაციის პირობებში, იმის გათვალისწინებით, რომ კანონმდებლობა რეფერენდუმის ქვეყნის მთელ ტერიტორიაზე ჩატარებას მოითხოვს, ზოიძემ აღნიშნა, რომ 2003 და 2005 წელს რეფერენდუმის ჩასატარებლად საჭირო გამოსავალი მოიძებნა, და იმედი გამოთქვა, რომ ამის საშუალება მოიძებნება ახლაც.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. ამ გადაწაყვეტილების გამო უმრავლესობა რამდენიმე წევრმა დატოვა.  

18 ნოემბერს აქციაზე სამართალდამცველებმა ადმინისტრაციული სამართალდარღვევის ფაქტზე სულ 37 ადამიანი დააკავეს. 18 ნოემბერს სპეცრაზმმა პარლამენტის შესასვლელებს ბოქლომები მოხსნა და ბარიკადებისგან გაათავისუფლა, ასევე რუსთაველის გამზირი კარვებისგან გაწმინდა. 

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“.

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ