გახარია: უპასუხისმგებლო პოლიტიკოსებს სახელმწიფოს ბლოკირების შესაძლებლობა არ უნდა ჰქონდეთ

საქართველოს პრემიერმინისტრმა, გიორგი გახარიამ მთავრობის სხდომის დაწყებამდე მინისტრთა კაბინეტის წევრებს კონცენტრაციის გაორმაგებისა და მეტი ყურადღებისკენ მოუწოდა, რომ „უპასუხისმგებლო პოლიტიკოსებს სახელმწიფოს ბლოკირების შესაძლებლობა არ ჰქონდეთ“.

მისი თქმით, პოლიტიკური პროცესი შეიძლება მიმდინარეობდეს ქუჩაშიც, თუმცა კანონის სრული დაცვით და ის უნდა სრულდებოდეს ლოგიკურად, საარჩევნო უბანზე.  

„საქართველო სრულად ადასტურებს, რომ ქვეყანაში გამოხატვის თავისუფლება არის დაცული და მიუხედავად იმისა, რომ ზოგიერთ უპასუხისმგებლო პოლიტიკოსს გამოხატვის თავისუფლება პარლამენტში შეჭრა და პოლიციის შეურაცხყოფა ჰგონია, ან თუნდაც პარლამენტის პიკეტირება, ჩვენ სრულად ვიაზრებთ ქვეყნის დემოკრატიზაციის მნიშვნელობას და რა თქმა უნდა, ჩვენი პასუხი იქნება კანონიერი და გააზრებული იმ პასუხისმგებლობით, რომელიც გვაქვს ჩვენი მოქალაქეების მიმართ. ყველა ეს ბოლო ქმედება მიზნად ისახავს სახელმწიფოს ბლოკირებას.

ეს არ ნიშნავს ცალკეული ინსტიტუტების ბლოკირებას, ეს ნიშნავს სრულად სახელმწიფოს ბლოკირებას. ამიტომ, თითოეულ თქვენგანს მოგიწოდებთ, გავაორმაგოთ კონცენტრაცია და ყურადღება, რომ უზრუნველვყოთ სახელმწიფო ინსტიტუტების ეფექტური ფუნქციონირება, რამეთუ ჩვენი ვალდებულებაა, ვიზრუნოთ თითოეულ მოქალაქეზე“, - განაცხადა გიორგი გახარიამ.

დღეს ოპოზიცია და აქტივისტები პარლამენტის პიკეტირებას გეგმავენ. პოლიტიკური ლიდერების თქმით, ისინი მმართველი გუნდის წევრებს შენობაში შესვლის და დაგეგმილი სხდომების მშვიდ ვითარებაში ჩატარების საშუალებას არ მისცემენ. ამის გამო პარლამენტის ყველა შესასვლელთან სამართალდამცველები არიან მობილიზებული. მათ საკანონმდებლო ორგანოსთან ჯებირები მიიტანეს. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.