კობახიძემ „ქართული ოცნება“ დედას, ხოლო ქვეყანა შვილს შეადარა

"ქართული ოცნების" აღმასრულებელი მდივნის, ირაკლი კობახიძის განცხადებით, არსებული კონტექსტის გათვალისწინებით საკონსტიტუციო ცვლილებების განხორციელება რეალური არ არის და ამაზე 30 ნოემბრის შეხვედრაზე, მმართველ პარტიას ოპოზიციის კონკრეტული წარმომადგენლებიც დაეთანხმნენ. ამის შესახებ კობახიძემ გადაცემა "კვირის თემა"-სთან ინტერვიუს დროს განაცხადა.

ირაკლი კობახიძემ უპასუხა ოპოზიციის ოთხ შეთავაზებასაც, რომელიც მმართველ პარტიას გუშინდელ შეხვედრაზე გააცნეს. ეს შეთავაზებები დღეს დავით უსუფაშვილმაც ჩამოთვალა: ე.წ. გერმანულ მოდელთან დაკავშირებით დოკუმენტის ვენეციის კომისიისთვის გაგზავნა, კონსტიტუციაში მცირედი ცვლილებების შეტანა, საკონსტიტუციო სასამართლოში ამ საკითხის განხილვა და მეოთხე - თავად ხელისუფლების მოსაზრება თუ როგორ ხედავს კრიზისიდან გამოსვლის გზას.

ვენეციის კომისიასთან დაკავშირებით ირაკლი კობახიძემ თქვა, რომ ეს იმდენად მარტივი საკითხია, რომ ვენეციის კომისიაში მისი გაგზავნა "ღირსების საქმეა":

"მათემატიკაში განტოლებები არსებობს: ერთ უცნობიანი, ორ უცნობიანი და ეს არის ერთგვარი უუცნობო განტოლება. წარმოიდგინეთ თქვენ, რომ ქართველი მათემატიკოსები შეიკრიბონ და ჰარვარდის უნივერსიტეტში გააგზავნონ უუცნობო განტოლება ამოსახსნელად. ეს ხომ იქნება ღირსების თემა ჩვენი საზოგადოებისთვის", - განაცხადა ირაკლი კობახიძემ და თქვა, რომ ვენეციაში გაგზავნასთან დაკავშირებით ოპოზიციას პასუხი 30 ნოემბრის შეხვედრაზევე გასცა მმართველმა გუნდმა.

რაც შეეხება საკონსტიტუციო ცვლილებას, კობახიძის თქმით, შეხვედრაზე ოპოზიციის კონკრეტული წარმომადგენლები უმრავლესობის წევრებს დაეთანხმნენ იმაში, რომ არარეალურია ახლა კონსტიტუციის ცვლილება: "რაიმე ასეთი საკონსტიტუციო ცვლილების ინიცირება დღეს გამოიწვევს უმრავლესობაში განხეთქილებას. არავითარ მძიმე კრიზისთან ჩვენ არ გვაქვს საქმე...", - განაცხადა ირაკლი კობახიძემ. 

მისი თქმით, ე.წ. გერმანულ მოდელში უამრავი ნიუანსია, რამაც შესაძლოა ვნებათაღელვა გამოიწვიოს: "მაგალითად ერთ-ერთი პრობლემაა: არაერთი "ფეიკ" ანუ ყალბი ან ერთკაციანი სატელიტი პარტია აქვს შექმნილი ოპოზიციას. ასეთი 10-ზე მეტი ფეიკპარტიაა, რომელიც იღებს სახელმწიფო დაფინანსებას მილიონობით, უფასო საეთერო დროს და ა.შ. ფეიკპარტიების პირობებში გერმანული მოდელი საერთოდ აზრს კარგავს. სად არის გარანტია, რომ ფეიკპარტიები არ იქნება გამოყენებული?", - განაცხადა ირაკლი კობახიძემ.

საკონსტიტუციო სასამართლოსთვის მიმართვასთან დაკავშირებით, კობახიძე ამბობს, რომ ახლა მალე იწყება საარჩევნო წელი: "იქაც ოპოზიციამ დააფიქსირა ასეთი რამ, რომ "საკონსტიტუციო სასამართლოს არ ვენდობით"-ო. რეალურად, ისეთ რამეებზე საუბრობენ ოპოზიციის წარმომადგენლები, რაც იციან რომ არარეალურია", - თქვა ირაკლი კობახიძემ.

და ბოლო შეთავაზება, თუ რა არის ამ ვითარებიდან მმართველი გუნდის აზრით გამოსავალი, კობახიძე ამბობს, რომ ხელისუფლების მიზანი "ნაცმოძრაობის ჩიხიდან გამოყვანა არ არის":

"ეს არის კავკასიური ცარცის წრე - ბიბლიური სცენა, როდესაც ბავშვს იყოფენ ერთმანეთში დედა და თვითმარქვია დედა. ამ შემთხვევაში "ქართული ოცნება" დადგა სწორედ დედის როლში, რომელმაც სცადა, რომ ყველაფერი გაეკეთებინა, რათა მინიმალურადაც არ სტკენოდა შვილს, ბავშვს, ქვეყანაზეა ამ შემთხვევაში საუბარი. და ეს გახდა იმის მიზეზი რატომაც გამოვიდა პარტიის თავმჯდომარე პროპორციული არჩევნების ინიციატივით. ამაზე პასუხი იყო ის, რომ სამი თვე დარჩნენ ოპოზიციის წარმომადგენლები აქციაზე, სამი თვის განმავლობაში ხელს სტკენდნენ ისინი ბავშვს. ეს არის მათი სახე", - განაცხადა ირაკლი კობახიძემ.

30 ნოემბერს სასტუმრო „ბილტმორში“ „ქართული ოცნების“ და ოპოზიციური პარტიების წარმომადგენლების შეხვედრა დაახლოებით 6 საათს გაგრძელდა. მას დიპლომატიური მისიების წარმომადგენლებიც ესწრებოდნენ. მხარეებმა მიმდინარე პოლიტიკური საკითხები განიხილეს.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.