უსუფაშვილმა დაასახელა ოთხი გამოსავალი, რომელიც ოპოზიციამ ხელისუფლებას შესთავაზა

"შენების მოძრაობის" ლიდერის, დავით უსუფაშვილის განცხადებით, ოპოზიციამ ხელისუფლებას 30 ნოემბერს გამართულ შეხვედრაზე არსებული ვითარებიდან გამოსავლის ოთხი გზა შესთავაზა. ამის შესახებ უსუფაშვილმა გადაცემა "კვირის თემაში" განაცხადა.

დავით უსუფაშვილის თქმით, მათი შეთავაზებები კრიზისიდან გამოსავალს ემსახურება:

"1. ამ საკითხზე დასკვნა და ანალიზი ვთხოვოთ ავტორიტეტულ საერთაშირისო ორგანიზაციების, გავუგზავნოთ ვენეციის კომისიას და რასაც იტყვიან, მზად ვართ ჩვენ შევასრულოთ, თუმცა ხელისუფლებამ უარი თქვა ამაზე;

2. საერთაშორისო დამკვირვებლების კითხვა იყო - თუ თვლით, რომ ეს მოდელი აკმაყოფილებს მაჟორიტარების მოთხოვნასაც (ანუ მაჟორიტარული წესითაც ჩატარდება), ივანიშვილის დაპირებასაც (ანუ პროპორციული იქნება არჩევნები), იმ მოსახლეობის და ახალგაზრდების მოთხოვნასაც, რომლებიც პროპორციულს ითხოვდა და ქუჩაში გამოსული ხალხის მოთხოვნასაც, რომ იყოს პროპორციული არჩევნები - ყველაფერს თუ აკმაყოფილებს და ამაზე ამბობთ, რომ "კონსტიტუციას ეწინააღმდეგება", სინამდვილეში ხომ არ უნდა საუბრობდეთ რომ კონსტიტუციაში მცირედი ცვლილებაა საჭირო?" თუ ვერ ვთანხმდებით ის [ოპოზიციის მიერ შემუშავებული ე.წ. გერმანული მოდელი] კონსტიტუციურია თუ არა, მაგრამ ვხედავთ რომ აკმაყოფილებს ყველას შესაძლო ინტერესს და მოთხოვნას, მაშინ კითხვაა ხელისუფლებასთან: რატომ არ უნდა შევიტანოთ ეს პატარა კონსტიტუციური ცვლილება? ამაზე ხელისუფლება უარს ამბობს იმიტომ რომ [ხელისუფლების თქმით] უმრავლესობაში ვითარება დაძაბულია და თუ კიდევ რამე ნაბიჯს გადადგამენ, უმრავლესობა დაეშლებათ...;

3. [ხელისუფლებას] ვეუბნებით, რომ თუ ჩვენ ხვალვე ამ პროექტის პარლამენტში განხილვას დავიწყებთ, წლის ბოლომდე ის შეგვიძლია რომ იყოს კანონი. ერთად წავიღოთ ეს ყველაფერი საქართველოს საკონსტიტუციო სასამართლოში, რომელიც კონსტიტუციურობის უმაღლესი ინსტანციაა, და სასამართლომ დაადგინოს არის თუ არა კონსტიტუციური. ამაზეც ამბობენ "არა"-ს. 

4. თქვენ გვითხარით ერთი წინადადება როგორ შეიძლება აღვადგინოთ ის მიღწეული კონსენსუსი, რომლის შედეგადაც ის ხალხი, რომელიც დღეს ქუჩაშია, იქნება სხვაგან", - განაცხადა დავით უსუფაშვილმა. 

30 ნოემბერს სასტუმრო „ბილტმორში“ „ქართული ოცნების“ და ოპოზიციური პარტიების წარმომადგენლების შეხვედრა დაახლოებით 6 საათს გაგრძელდა. მას დიპლომატიური მისიების წარმომადგენლებიც ესწრებოდნენ. მხარეებმა მიმდინარე პოლიტიკური საკითხები განიხილეს.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.